काठमाडौं (हाम्रो खेलकुद)– राष्ट्रिय टोलीको जिम्मेवारी पुरा गरेर माल्दिभ्स फर्केका गोलकिपर किरणको टोलीले माले लिगमा पुनः सुरु हुँदा जित हासिल गरेको छ । किरणको टोली टिसी स्पोर्टस्ले युनाइटेड भिक्ट्रीलाई शुक्रबार २–० ले हराएको छ । टिसी स्पोर्टस् अलि नाफिउ र अलि नासुदले गोल गरेका थिए ।

 

लिगमा दुई खेलमा दुवै खेलमा टिसी स्पोर्टसले सफलता प्राप्त गरेको छ । चैत ६ गतेका लागि तय भएको टिसी स्पोर्टस र युनाइटेडको खेल त्यति बेला फ्लुका कारण स्थगित भएको थियो ।

लिगको विश्राम अघिको जस्तो टोलीले प्रदर्शन गर्न नसकेको जनाउँदै किरणले हाम्रो खेलकुद डटकमलाई भने,‘ धेरै दिनपछि भएर होला सुरुमा हाम्रो लय मिलेन । एकजना मिडफिल्डको राम्रो खेलाडी थिएनन् । दोस्रो हाफमा सुधारिएको प्रदर्शन गर्यौं र सफलता मिल्यो । तर हामीले क्षमता अनुसारको प्रदर्शन आजको खेलमा गर्न सकेनौं । ’

त्यसको पर्सी पल्ट चैत ८ गते किरण फिलिपिन्सविरुद्ध एसियन कप छनोटअन्तर्गत समूह चरणको पहिलो खेलका लागि स्वदेश फर्केका थिए । चैत १५ मा भएको खेलमा नेपाल फिलिपिन्ससँग उसको मैदानमा ४–१ ले पराजित भएको थियो । त्यसपछि स्वदेश फर्केर किरणअघि माल्दिभ्स पुगेका थिए ।

पुसमा टिसीमा स्पोर्टसमा आबद्ध भएदेखि उनले उच्च प्रदर्शन गरिरहेका छन् । उनको उच्च प्रदर्शनबाट प्रेरित टोलीले फागुनमा बंगलादेशमा शेख कमल क्लब कपको उपाधि जितेको थियो । बंगलादेशबाट माल्दिभ्स पुगेर लिगको आफ्नो पहिलो खेल ३–० ले जितेको थियो । किरणले दुई खेलमा एक गोल पनि खाएका छैनन् ।

माले लिगमा किरणको टोलीसहित शीर्ष ३ टोलीको समान ६ अंक छ । गोलअन्तरमा न्यू राडियन्ट स्पोर्टस् क्लब पहिलो, टिसी स्पोर्टस दोस्रो र माजिया एसआरसी तेस्रो स्थानमा छ । किरणको टोलीले अप्रिल १२मा भिक्ट्रीसँग प्रतिस्पर्धा गर्नेछ ।