काठमाडौँ (हाम्रो खेलकुद) – न्यु रोड टिम (एनआरटि)लाई पराजित गर्दै जगदम्बा लुम्बिनी फुटबल क्लबले ललित स्मृति यू-१८ फुटबल प्रतियोगितामा विजयी सुरुवात गरेको छ। जित हात पार्दै ३ अंक जोडेको लुम्बिनीले दुवै हाफमा १/१ गोल गरेको थियो।
पछिल्लो संस्करणको उपविजेता टोली लुम्बिनीले खेलको २६औं मिनेटमा अजित थापा गोलसँगै अग्रता लिएको थियो। एनआरटिमाथि खेलभर हावी रहेको लुम्बीनीले पटक पटक आक्रमणको जालो बुनेपनी गोलरक्षक सन्देश गुरुङ त्यसको बाधक बनेका थिए। पछिल्लो संस्करणमा लुम्बिनीकै जर्सी पहिरिएका सन्देश यो पटक भने कप्तान अशोक थापासँगै एनआरटिमा होमिएका छन्।
दोश्रो हाफको ६५औं मिनेटमा अनुप गुरुङले लुम्बिनीको अग्रता दोब्बर पारेका थिए। विङ्सबाट आएको क्रसमा हेडरमार्फत गोल गर्दै अनुपले लुम्बिनीलाई जित दिलाएका थिए।
खेलपछि लुम्बिनीका प्रशिक्षक विकास गुरुङले टोली फाइनलमा पुग्ने लक्ष्य लिएर उत्रेको बताए। “यो प्रतियोगिता मोफसलको टोलीहरुका लागि अनुभव बटुल्ने मौका रहेकोले त्यसको भरपुर उपयोग गर्नेछौँ। हामीले ८ जना खेलाडीलाइ पहिलोपटक जिल्ला बाहिर ल्याएर खेलाएका थियौं, त्यसैले उनीहरु केहि हतास देखिएका थिए।”
पराजित टोलीका प्रशिक्षक महेश्र्वर मुल्मीले कम तयारी र खेलाडीहरुबीच तालमेल नमिल्दा पराजय भोगेको बताए। “हामीले टुडिखेलमा २ साता प्रशिक्षण गरेर टोली तयार पारेका हौँ। हाम्रो लागि यस प्रतियोगिता सहभागितामा मात्र सिमित रहनेछ।”
