बार्सिलोना (एजेन्सी) – कोपा डेल रेको फाइनलमा अलाभेसलाई पराजित गर्दै बार्सिलोनाबाट सुखद विदाई पाएका लुइस इनरिकेको ठाउँमा बार्सिलोनाले अर्नेस्टो भालभर्देलाई नयाँ प्रशिक्षकको रुपमा सार्वजनिक गरेको छ । एथलेटिक बिल्बावोका पूर्व प्रशिक्षक भालभर्दे २ वर्षको सम्झौतामा बार्सिलोनासँग आबद्ध भएका छन् ।
इनरिके मार्च महिनामा सिजनको अन्त्यमा बार्सिलोना छाड्ने निर्णय गरेपछि बार्सिलोना नयाँ प्रशिक्षकको खोजिमा थियो । करिब १ साता अघि भालभर्देले एथलेटिकसँगको सम्झौता नविकरण नगर्ने बताएका थिए ।
भालभर्देसँग १५ वर्षसँगै काम गरेका जोन आसपिएजु बार्सिलोनाको साहायक प्रशिक्षकको रुपमा क्लब भित्रिएका छन् । इनरिकेको प्रस्थानपछि बार्सिलोनाका मुख्यतः प्रशिक्षण तर्फका कर्मचारीहरु सेल्टा भिगो पुगेका छन् ।
‘भालभर्देसँग ज्ञान र अनुभवका साथै युथ फुटबलमा पनि लगाव छ । हामीले खोजेको गुण उनमा छ, ’ बार्सिलोनाका अध्यक्ष जोसेप मारिया बार्टोम्युले भने, ‘उनको शैली र बार्सिलोनालाई सुहाउँदो छ । मेहनती भएकै कारण हामिले उनलाई रोजेका हौं । ’
खेलजीवनमा फरवार्डका रुपमा रहेका ५३ बर्षे भालभर्देले १९८८–९० को सिजन बार्सिलोनामा बिताएका थिए ।
