ललितपुर (हाम्रो खेलकुद)– ए डिभिजन क्लब जाउलाखेल युथ क्लबले आफ्ना महासचिव मनमोहन केसीको नाममा सामाजिक कार्यका लागि ५ लाख रुपैयाँको अक्षयकोषको स्थापना गर्ने घोषणा गरेको छ ।
केसीको निधन भएको १३ औं दिनको पून्यतिथीमा आयोजित शोकसभामा बोल्दै क्लबका अध्यक्ष ठूलोभाई केसीले उक्त घोषणा गरेका हुन् । अध्यक्ष केसीले क्लबको निर्माणाधिन बैठक हलको नाम मनमोहन स्मृति हल राख्ने पनि जानकारी दिएका थिए । मुटुको समस्या र निमोनियाका कारण जेठ ५ गते केसीको निधन भएको थियो ।
शोकमन्त्व्य राख्ने अधिकांशले स्वर्गिय केसीको व्यक्तित्वका बारेमा चर्चा गरेका थिए । ललितपुरका काँग्रेस सभापति एवंम् सांसद मदन अमात्यले केसी क्लब र पार्टीका सच्च सिपाहीको निधनले अपुरणीय क्षेति भएको बताए ।
केसीका पिता पुष्कर केसीले सबैको भनाईले आफ्नो छोरा असल काममा लागेको सुन्दा अझै गर्व लागेको सुनाए । ‘उसको निधनले मेरो परिवारलाई ठूलो क्षेति भएको छ । हामी दुःखत घडीमा छौं,’ उनले भने,‘यस्तो घडीमा तपाईहरुले साथ दिनुभएकोमा धन्यवाद । क्लबलाई सकेको सहयोग हाम्रोतर्फबाट पनि हुनेछ ।
नेपाली काँग्रेसका अर्का सांसद उदयशम्सेर राणा, अखिल नेपाल फुटबल संघ (एन्फा) का अध्यक्ष नरेन्द्र श्रेष्ठ, नेपाल खेलकुद पत्रकार मञ्चका महासचिव प्रकाश तिमल्सिना लगायत क्लबका अन्य पदाधिकारीले केसीको निधनले ठूलो क्षेति भएको बताएका छन् ।
क्लबका पदाधिकारीले केसीले क्लबका लागि देखेको सपना पुरा गर्न लागि पर्ने प्रतिबद्धता जनाए । सोही अवसरमा सांसद अमात्यले क्लबको निर्माणाधिन भवनका लागि सबै सहयोग आफुले जुटाउने प्रतिबद्धता व्यक्त गरे ।
