अर्जुन कार्की
बागलुङ– अखिल नेपाल फुटबल संघको वार्षिक कार्यक्रम अनुसार प्रत्येक बर्ष आयोजना हुने जिल्ला लिग फुटबल प्रतियोगिता बागलुङमा अर्को साताबाट सुरु हुँदैछ । जिल्ला संघ बागलुङको मंगलबार संघका अध्यक्ष रामराज गुरुङको अध्यक्षतामा बसेको बैठकले जेठ २२ गते लिग फुटबल प्रतियोगिता सुरु गर्ने निर्णय गरेको हो ।
संघका उपाध्यक्ष टक बहादुर बोहोराको संयोजकत्वमा ५ सदस्य समिति गठन गरेको छ । समितिको सदस्यहरुमा विकास थापा, मधुसुदन राजभण्डारी, रेशम गोतामे र मनिष रायमाझी छन् । लिग विजेताले उपाधिसहित ५० हजार र दोस्रोले २५ हजार रुपैयाँ प्राप्त गर्नेछन् ।
प्रतियोगिताका सर्वोत्कृष्ट खेलाडी र अनुशासित टोलीले समान २ हजार रुपैयाँ प्राप्त गर्नेछन् । प्रतियोगिताका उत्कृष्ट गोलकिपर, रक्षक, मिडफिल्ड, फरवार्ड र उच्च गोलकर्ताले समान १ हजार रुपैयाँ पाउनेछन् । लिगमा सहभागी टोलीले जिल्ला बाहिरका ४ खेलाडी सम्म खेलाउन पाउने बताइएको छ ।
