कार्डिफ (एजेन्सी)– च्याम्पियन्स लिग इतिहासमा रियल मड्रिड उपाधि रक्षा गर्ने पहिलो टोली बनेको छ । आइतबार बिहान भएको फाइनलमा इटालियन क्लब युभेन्ट्सलाई ४–१ ले हराउँदै स्पेनिस क्लब रियलले च्याम्पियन्स लिग उपाधि जितेको हो । रियलको जितमा फेरी एकपटक क्रिस्टियानो रोनाल्डो नायक बनेका छन् । उनले २ गोल गरे । 

पहिलो हाफ १–१ को बराबरीमा टुंगिएको खेलको दोस्रो हाफमा तीन मिनेटको फरकमा दुई गोल गर्दै रियलले उपाधि रक्षा अभियानलाई मजबुत पारेको थियो । रोनाल्डोले पहिलो हाफको २० औं मिनेटमामा पहिलो गोल गरेका थिए । तर त्यो लामो समय टिकेन । २७ औं मिनेटमा मान्डजुकीले बराबरी गोल गर्दै खेललाई रोमाञ्चक मोडमा पुर्याएका थिए ।

तर, ६१ औं मिनेटमा कासिमेरोको गोलमा रियलले अग्रता बनाएको थियो । त्यसको तीन मिनेटपछि नै रोनाल्डोले अर्को गोल थप्दै रियललाई जितको हकदार बनाएका थिए । लुका मोड्रिचको क्रसलाई रोनाल्डोले गोलमा परिणत गरेका थिए । दबाबमा रहेको युभेन्ट्सले १० खेलाडीमा सिमित हुँदै खेलको अन्त्य गरेको थियो । रियलका कप्तान सर्जियो रामोसलाई धक्का दिएपछि काडार्डो दोहोरो पहेलो कार्ड पाउँदै मैदान बाहिरिएका थिए ।

एक खेलाडी कम भएपछि युभेन्ट्सले अर्को गोलको सामना गर्नुपरेको थियो । अन्तिम मिनेटमा मार्सेलोको क्रसमा मार्को एसेन्सियोले पेनाल्टी बक्स भित्रबाट गोल गर्दै गोलअन्तरलाई बढाएका थिए ।

रियल सबैभन्दा बढी च्याम्प्यिन्स लिग उपाधि जित्ने टोली हो । रियलको यो १२ औं च्याम्पियन्स लिग हो । क्लबका पूर्व स्टार जिनेदिन जिदानको प्रशिक्षणमा टोली लगातार दोस्रो पटक उपाधि जित्न सफल भएको छ ।

यो फाइनलमा समेत गोल गरेपछि रोनाल्डोले कीर्तिमान बनाएका छन् । च्याम्पियन्स लिगको तीनवटा फाइनलमा गोल गर्ने उनी पहिलो खेलाडी बनेका छन् । उनले यसअघि सन् २००८ मा म्यानचेस्टर युनाइटेड र २०१४ मा रियलका लागि फाइनलमा गोल गरेका थिए ।