पोखरा (हाम्रो खेलकुद)– स्पेनिस क्लब बार्सिलोनाका समर्थकहरुले गठन गरेको बार्सा नेपालले आज पोखरामा सरसफाई कार्यक्रम गरेको छ । ‘अग्रजलाई सम्मान युवालाई प्रोत्साहन, समाज सुधारमा बार्सा नेपाल पोखराको अभियान’ भन्ने मूल नारा तय गर्दै सामाजिक कार्यको थालनी गरेको बार्सा नेपालले पोखराको चिप्लेढुंगा र त्यस आसपासका क्षेत्र सरसफाई गरेको थियो ।
मानवाधिकार चोकबाट सुरू गरिएको सरसफाइ चिप्लेढुंगा, महेन्द्र पुल हँदै नयाँबजारमा पुगेर टुंगिएको थियो । सरसफाई कार्यक्रममा बार्सा नेपाल पोखराका ३५ सदस्यको सहभागिता थियो ।
पोखरा लेखनाथ महानगरपालिकाले अभियानलाई सघाउन निम्ति डोको, कुचो, बेल्चालगायतका आवश्यक सामाग्री तथा पोखरा रामघाट अवस्थित दिपु फार्मेसीले माक्स र पञ्जा सहयोग गरेको थियो । सरसफाई कार्यक्रममा स्थानिय बासिन्दाले पनि साथ दिएका थिए । बार्सा नेपालले पोखराको सरसफाइका लागि आउने दिनमा पनि काम गर्ने जनाएको छ ।
