काठमाडौँ (हाम्रो खेलकुद) – इन्डोनेसियाको लिगा १ अन्तर्गत शनिबार भएको खेलमा नेपाली राष्ट्रिय टोलीका मिडफिल्डर रोहित चन्दको टोली पर्सिजा जकार्ताले आफूभन्दा माथि रहेको टोली पर्सिजा भायांकारा सुरबयालाई १-०ले पराजित गरेको छ। अंक तालिकाको तेश्रो स्थानमा रहेको टोलीलाई पराजित गर्दै रोहितको टोली पाँचौ स्थानमा पुगेको छ।
पर्सिजाका लागि खेलको दोश्रो हाफको इन्ज्युरी समयको दोश्रो मिनेटमा ब्रुनो लोपेसले गोल गरेका थिए। खेलको वार्म अपका दौरान घाइते भएपछि रोहितले खेलमा सहभागिता जनाएनन्। यद्दपी उनको नाम पहिलो रोजाइमा रहेको थियो। उनको स्थानमा हर्गीयान्तोले खेलेपनि उनको प्रदर्शन सन्तोषजनक रहन सकेन। उनलाई प्रशिक्षक टेकोले ५६औं मिनेटमा परिवर्तन गरेका थिए।
रोहितको अनुपस्थितिमा टोलीको प्रदर्शन खस्किएको समर्थकहरुले सामाजीक संजालमार्फत पनि आफ्नो राय दिएका छन्। पर्सिजाले १७ खेलमा ७ जित, ३ हार र ७ बराबरीसँगै २८ अंक जोडेको छ।
रोहितको चोटको बारेमा विस्तृत विवरण आउन बाँकी रहेको छ।
