म्याड्रिड (एजेन्सी)– रियल म्याड्रिडका कप्तान सर्जियो रामोसले टोलीको सफलतामा एष्र्या गर्नेहरु रहेको बताएका छन् । आइतबार ३–० ले रियल जितेको खेलमा रामोस इन्जुरी समयको पहिलो मिनेटमा दोहोरो पहेलो कार्डका कारण मैदान बाहिरिनु परेको थियो । रेफ्रीको त्यहि निर्णयलाई रामोसले एष्र्याका रुपमा अर्थ लगाएका छन् ।

गेराथ बेल, कासिमेरो र टोनी क्रुसले गोल गरेको गोलबाट जितका साथ रियलले उपाधि रक्षाको यात्रा प्रारम्भ गरेको थियो । तर, डिपोर्टिभो लाकुरुनासँगको दोस्रो हाफ भने विवादस्पद रह्यो । विपक्षी रक्षक फावियन स्करसँग अल्झिदा रामोसले पहिलो पहलो कार्ड पाएका थिए । त्यसपछि इन्जुरी समयमा परिवर्तित बोर्जा भालेलाई एरियल बलमा चुनौति दिदा रामोसले दोस्रो पहेलो कार्ड पाएका थिए ।

रियलका प्रशिक्षक जिनेदिन जिदानले पनि बारम्बार रेफ्रीको निर्णयलाई लिएर असन्तुष्टी पोखिरहेका छन् । स्पेनिस सुपर कपको पहिलो लेगको घटनालाई लिएर टोलीका सुपर स्टार क्रिस्टियानो रोनाल्डोमाथि पाँच खेलको प्रतिबन्ध लागेपछि जिदानले असन्तुष्टी व्यक्त गर्दै आइरहेका छन् ।

ला लिगामा कीर्तिमानी १८ रातो कार्ड पाइसकेका रामोसले लगातार दुई पटक च्याम्पियन्स लिग विजेता टोलीले राम्रो गरेको सबैले मन पराउँछन् भन्ने नरहेको बताए । ‘हामी खुला भएर कुरा गर्न सक्छौं,’ रामोसले भने,‘हामीले राम्रो गरेको सबैलाई मन पर्छ भन्ने छैन । तर पनि हामी हरेक रात राम्ररी निदाउँछौं । जहाँ केही विवादास्पद निर्णय भएको छ । तर पनि महत्वपूर्ण विषय भनेको हामीले जितबाट सुरुआत गरेका छौं । तर दोस्रो पहेलो कार्डसँगै मैदान छोड्नु भनेको एकहद सम्म दबाब बढाउने प्रयास हो ।’

रियलबाट सबै प्रतियोगितामा गरि ५ सय २६ खेल खेलिसकेका रामोसले अहिले सम्म २३ पटक रातो कार्ड पाइसकेका छन् । तर, स्पेनका लागि १ सय ४३ खेलमा उनले अहिले सम्म रातो कार्डको दर्शन गर्नुपरेको छैन । यद्दपी उनी स्पेनिस रेफ्रीले आफुमाथि पूर्वाग्रह राखेर निर्णय नगर्ने बताए । तर, समग्रतामा उनीको नजरमा इङ्ल्यान्डका अफिसियलले समग्रतामा राम्रो काम गरिरहेको सुनाए ।

‘मलाई लाग्दैन कुनै पनि निर्णय पहिले नै सोचिएका हुन्छन् । तर, केही खेलाडीलाई विशेष निगरानी राखिन्छ,’ उनले भने,‘रेफ्रीलाई अझै बढी च्याम्पियन्स लिग र अन्तर्राष्ट्रिय खेलमा मौका दिन आवश्यक छ । हामीले इङ्ल्यान्डको अभ्यासलाई हेर्नुपर्दछ । त्यहाँ खेलपछि पनि त्यसको विश्लेषण र कारवाही हुने गरेको छ । हामीले भन्दा त्यहाँ राम्रो अभ्यास गररिहेका छन् । ’