लन्डन (एजेन्सी)– इङ्ल्यान्डका पूर्व कप्तान एवंम् म्यानचेस्टर युनाइटेडका महान खेलाडी डेभिड ब्याकह्यामले वायन रुनी प्रति ठूलो सम्मान प्रकट गरेका छन् । युनाइटेड र इङ्ल्यान्डका पूर्व कप्तान समेत रहेका रुनीले अन्तर्राष्ट्रिय फुटबलबाट सन्न्यास लिने घोषणा गरेपछि बेकह्यामले सामाजिक सञ्जालमार्फत सम्मान व्यक्त गरेका हुन् ।

३१ वर्षे रुनीको सन्न्यासको घोषणा सार्वजनिक भएसँगै समकक्षी थ्रुपै खेलाडीले उनको तारिफ गर्दै सम्मान देखाएका छन् । त्यसमध्ये बेकह्यामले उनको खुलेर प्रशंसा गरेका छन् । आफुले कप्तानी गरेको खेलमा रुनीसँगको तस्बिरसहित बेकह्यामले उनको सन्न्यासमा आफ्नो धारणा राखेका छन् ।

बेकह्यामले इन्स्टाग्राममा राखेको सन्देश ।

‘जति बेला तिमि १७ बर्षको उमेरमा देशका लागि पहिलो खेल खेल्न अघि बढेका थियो । त्यति बेलानै लागेको थियो । तिमिले इङ्ल्यान्डका लागि लामो समय खेल्नेछौं । मैले त्यस्तो टोलीलाई कप्तानी गर्ने अवसर पाए जसमा वायन रुनी जस्ता खेलाडी थिए, किनकी एउटा कप्तानका लागि विजयी मानसिकता, चाहना र लगाव भएको खेलाडीको आवश्यकता पर्दछ । त्यो सबै रुनीमा थियो । त्यसैले त उनले क्लब र देशका लागि गोलमा कीर्तिमान तोडे । उनको सन्न्यासको निर्णयले व्यक्तिगत रुपमा मलाई दुःख लागेको छ । त्यसको एउटा कारण उनलाई समर्थकले धेरै माया गर्छन् । त्यसकारण पनि उनका लागि थ्री लायन्सको जर्सी लगाउनु उनका लागि कति अर्थपूर्ण थियो । त्यो देख्न पाइनेछैन । उनी विशेष क्षमता भएका खेलाडी हुन् । त्यहि विशेष क्षमताको हामी निरन्तरता चाहन्छौ । वी लभ यू ………. ११९ आउट ’

सन् २००३ मा राष्ट्रिय टोलीबाट ‘डेब्यू’ गरेका रुनीले १ सय १९ खेलमा ५३ गोल गरेका थिए । १३ बर्ष युनाइटेडमा बिताएर यो सिजन पुनः एभर्टन फर्केका उनी इङ्ल्यान्डका लागि सर्वाधिक गोल गर्ने खेलाडी हुन् ।

त्यस्तै उनी देशका लागि सर्वाधिक खेल्ने खेलाडीको सुचिमा दोस्रो नम्बरमा पर्दछन् । गोलकिपर पिटर सिल्टोनमात्र उनीभन्दा अगाडि छन् । एभर्टनमा पुनरागमनयता रुनी उच्च फर्मममा देखिएका छन् । प्रिमियर लिगका पछिल्ला दुई खेलमा उनीले दुई गोल गरिसकेका छन् ।