मोन्टेभिडियो (एजेन्सी)– विश्व कप दक्षिण अमेरिका छनोट अन्तर्गत उरुग्वे र आर्जेन्टिना बीच प्रतिस्पर्धा हुँदैछ । १ अंकले मात्र फरक रहेका यी दुई टोलीबीचको खेल दुवै टोलीका लागि महत्वपूर्ण छ । छनोटको शीर्षस्थानमा रहेको ब्राजिलले छैटौं स्थानको इक्वेडरलाई निम्त्याउँदै छ ।

अहिले सम्म छनोटमा भएका खेलबाट उरुग्वे २३ अंक जोड्दै तेस्रो स्थानमा छ । अर्जेन्टिना २२ अंकको साथमा पाँचौ स्थानमा छ । छटौं स्थानको इक्वेडरको २० अंक छ । अंक तालिकाको शीर्ष ४ मा रहने टोलीले अर्को बर्ष रुस विश्व कपमा स्वतः प्रवेश पाउनेछन् । पाँचौ स्थानको टोलीले भने ओसियाना क्षेत्रको विजेतासँग प्ले अफमा भिड्नु पर्ने हुनेछ ।

चिलीसँगको १–० जितमा सहायक रेफ्रीसँग दुव्र्यवहार गरेको आरोपमा अर्जेन्टिनाका सुपर स्टार लियोनल मेस्सी माथि चार खेलको प्रतिबन्ध लगाइएको थियो । त्यसकाविरुद्ध अपिल गर्दा मेस्सीको पक्षमा निर्णय आयो जसले गर्दा उनले अर्जेन्टिनाको नेतृत्व सम्हाल्दै छन् । । मेस्सीको अनुपस्थितिमा अर्जेन्टिनाले छनोटकै खेलमा बोलिभियासँग २–० को पराजय भोगेको थियो ।

त्यस्तै छनोट हुने बलियो स्थितिमा रहेको उरुग्वे लगातार पछिल्लो तीन खेलमा पराजित भएपछि दबाब बढेको हो । घुँडाका चोटका कारण केहि समययता मैदान बाहिर रहेका लुइस स्वारेज टोलीमा समावेश गरिएपनि उनी अर्जेन्टिनाविरुद्ध खेल्ने सम्भावना कम छ ।

दक्षिण अमेरिकी क्षेत्रको अन्य खेल – भेनेजुएलाविरुद्ध कोलम्बिया, चिलीविरुद्ध पाराग्वे, ब्राजिलविरुद्ध इक्वेडर,पेरुविरुद्ध बोलोभिया