गेटाफे (एजेन्सी) – यस सिजन ला लिगामा अपराजित रहेको बार्सिलोना आज साँझ गेटाफेसँग उसैको घरेलु मैदानमा भिड्दै छ । तीन खेलमा शतप्रतिशत नतिजासहित बार्सिलोना अंक तालिकाको अग्रस्थानमा रहेको छ ।

मंगलबार राती युभेन्टसलाई च्याम्पियन्स लिगमा ३-० ले हराएको बार्सिलोनाले यस खेलमा आफ्ना केही खेलाडीहरुलाई विश्राम दिने सम्भावना छ । बार्सिलोनाले आफ्नो अघिल्लो लिग खेलमा पनि इस्पानियोललाई ५-० को फराकिलो गोलअन्तरले हराएको थियो । बार्सिलोनाका लागि आर्दा टुरान अझै घाइते रहेकाले उनी खेलमा सहभागी हुने छैनन् ।

अर्को तर्फ गेटाफेले पनि पछिल्लो लिग खेलमा लेगानेसलाई २-१ ले हराएको थियो । टोली सन्तुलित देखिएकाले गेटाफेले टोलीमा धेरै परिवर्तन गर्ने असम्भाव्य देखिन्छ । लिगमा ३ खेल खेलिसकेको गेटाफे भने ४ अंकसहित तालिकाको दसौँ स्थानमा अवस्थित छ ।

आफ्ना अघिल्ला १० लिग खेलमा सबै आफ्नो पक्षमा पार्न सफल रहेको बार्सिलोनाले गेटाफे विरुद्ध भने झन् पछिल्ला १७ खेलमध्ये १४ मा जित हांसिल गरेको छ । ३ खेलमा ९ गोल पनि गरेको बार्सिलोनाको यो सिजनको सुरुवात अहिलेसम्मकै उत्कृष्ट रहेको समेत क्लबले जनाएको छ ।

५ गोलसहित लिगका सर्वाधिक गोलकर्ता रहेका लियोनल मेस्सी पनि आफ्नो त्यस सङ्ख्यामा वृद्घि गर्ने दाउमा हुनेछन् । खेल आज साँझ नेपाली समयअनुसार ८ बजे सुरु हुने छ ।

नेपाली समय अनुसार आजका अन्य ला लिगाको खेलहरु

लेभान्टे विरुद्ध भ्यालेन्सिया ४.४५ बजे

रियल बेटिस विरुद्ध डेपोर्टिभो १०.१५ बजे

एट्लेटिको म्याड्रिड विरुद्ध मालागा (राती) १२.३० बजे