काठमाडौं (हाम्रो खेलकुद) – करिब ३ साता अगाडी भारतसँग साफ यू-१५ च्याम्पियनसिपमा पराजित नेपाली उमेर समूहको टोलीले घरेलु मैदानमा अर्को परिक्षाको सामना गर्दै छ ।

एफिसी यू-१६ च्याम्पियनसिपको छनोट अन्तर्गत समूह ‘डी’ मा नेपालले घरेलु मैदानमा इराकसँग खेल्दै सुरुआत गर्नेछ । इराक अघिल्लो च्याम्पियनसिपको साविक विजेता पनि हो । इराक लगातय प्यालेस्टाइन र भारत पनि यसै समूहमा छन् । गत महिना मात्र साफ यू-१५ टोलीमा भारतसँग दुइ पटक पराजित नेपाली टोलीले अझ कडा प्रतिद्वन्दीको सामना गर्नुपर्नेछ । राष्ट्रिय फुटबल टोलीको फिफा वरियतालाई आधार मान्ने हो भने दुवै प्यालेस्टाइन र इराक भारत भन्दा धेरै माथि छन् ।

यसै प्रतियोगितामा नेपाली टोलीको निटकको इतिहास हेर्ने हो भने २०१४ मा विमल घर्ती मगरको कप्तानीमा रहेको नेपाली टोलीले घरेलु मैदानमा छनोट चरण अन्तर्गतको खेलमा इराकलाई २-२ को बराबरीमा रोकेको थियो । अहिले राष्ट्रिय टोलीका नियमित र महत्वपूर्ण सदस्य विमल र अन्जन विस्टले नेपालका लागि गोल गरेका थिए । अन्य प्रतिद्वन्दी तुर्कमेनिस्तान र बलियो बहराइनलाई हराउँदै बाल गोपाल महर्जनले सम्हालेको टोली छनोट चरणमा समूह विजेता हुँदै थाइल्याण्डको च्याम्पियनसिपमा छनोट टोलीले राम्रो प्रदर्शन गरेपनि समूह चरण पार गर्न सकेको थिएन । त्यसो समय प्रशिक्षकको भूमिकामा रहेका सुनिल श्रेष्ठले यसपटकको टोली सम्हालेका छन् ।

त्यसपछिको ब्याचले  किर्गिस्तानमा समूह उपविजेता हुँदै भारतमा सम्पन्न २०१६ को प्रतियोगितामा छनोट भएपनि बढी उमेरको खेलाडी खेलाएको कारण फाइनल चरणको स्थान गुमाएको थियो । नेपालले जोर्डनलाई २-१ र किर्गिस्तानलाई ४-२ ले हराएको थियो भने ओमानसँग ३-१ ले पछि परेको थियो । त्यहि वर्ष इरानलाई फाइनलमा हराउँदै इराकले उपाधि जितेको थियो ।

गत महिना सातदोबाटो स्थित एन्फा टेक्निकल सेन्टरको कृतिम मैदानमा साफ यू-१५ च्याम्पियनसिपको फाइनल पुगेको टोलीमा प्रशिक्षक श्रेष्ठले ४ परिवर्तन गरेका छन् । पहिलो खेलको नतिजाले प्रतियोगिताको अन्य खेलहरु प्रतिको दृष्टिकोणमा असर पार्ने भएका कारण नेपालले शत प्रतिशत दिदै सकारात्मक सुरुआत गर्ने प्रशिक्षक श्रेष्ठको लक्ष्य छ ।

इराकका प्रशिक्षक अलि हादीले भने समूह विजेता हुँदै फाइनल चरणमा पुग्ने लक्ष्य लिएका छन् । उनले नेपाली टोलीलाई बलियो लिएता पनि पहिलो खेलमा जितसँगै प्रतियोगितामा विजयी सुरुआत गर्ने उनको लक्ष्य छ ।