काठमाडौं (हाम्रो खेलकुद)– चर्चित युरोपियन फुटबल क्लबको फ्यान क्लब गठन हुने क्रममा अर्को एउटा नाम पनि थप भएको छ । जर्मन क्लब बायर्न म्युनिखको फ्यान क्लब हिजो राजधानीमा गठन भएको छ ।
मिया सान मियाको नाममा गठन भएको समूहको अध्यक्षमा नवीन पाडे र उपाध्यक्षमा मिर्को जुन्के रहेका छन् । जर्मन दुतावासकी प्रतिनिधि पाउला वार्नरको प्रमुख आतिथ्यतामा समूहको गठन भएको थियो । वार्नरले दुतावासका तर्फबाट समूहको सफलताका लागि शुभकामना दिएकी थिइन् ।
नेपालमा खेलकुद र सामाजिक गतिविधिमा संलग्न हुने उद्देश्यका साथ समूहको गठन गरिएको अध्यक्ष पाडेले जानकारी दिए । उपाध्यक्ष जुन्केले बायर्न म्युनिखको सन्देश कार्यक्रममा प्रस्तुत गरेका थिए । बायर्नले क्लबको सफल सुरुआतको कामना गर्दै सहकार्यका लागि तयार रहेको उल्लेख गरेको बताइएको छ ।
नेपालमा युरोपियन क्लब बार्सिलोना, रियल म्याड्रिड, चेल्सी, म्यानचेस्टर युनाइटेड, आर्सनल, लिभरपुल, टोटेनह्यामलगायतको फ्यान क्लब यसअघि नै गठन भइसकेको छ ।
