काठमाडौं (हाम्रो खेलकुद)– अखिल नेपाल फुटबल संघ (एन्फा) को निर्वाचन पूर्व निर्धारित समय भन्दा झन्डै तीन साता पछि हुने भएको छ । एन्फाले माघ ११ गतेलाई केन्द्रिय कार्यसमितिको मिति तय गर्दै निर्वाचनका लागि दुई वटा समिति गठन गरेको छ ।

एन्फा बैठक । फाइल तस्बिर

यसअघि पुस २३ गतेका लागि निर्वाचन तय थियो । अबको निर्वाचनले चार वर्षका लागि १७ सदस्यीय कार्यसमितिको समितिको चयन गर्नेछ ।नरेन्द्र श्रेष्ठको अध्यक्षतामा बसेको एन्फा कार्यसमिति बैठकले अधिवक्ता सुमन केसीको संयोजकत्वमा निर्वाचित समिति र मोतीराम गौतमको संयोजकत्वमा निर्वाचत अपिल समिति गठन गरेको छ ।

दुवै समिति दुई वैकल्पिक सदस्यसहित पाँच सदस्यीय रहेको छ । एन्फाले आफु मातहतका जिल्ला समितिलाई पनि निर्वाचनका लागि समय सिमा तोकेको छ । निर्णय अनुसार जिल्लाको निर्वाचन कात्तिकको २५ देखि मंसिरको २५ गते सम्म सक्नु पर्नेछ ।

हरेक जिल्लाबाट १, ए डिभिजन बाट १४, बी डिभिजनबाट ९, सी डिभिजनबाट ५, खेलाडी, प्रशिक्षक, रेफ्री र महिला समितिबाट समान १ गरि ७७ जनाले मताधिकार प्राप्त गर्नेछन् । एन्फा साधारण सभामा प्रतिनिधि भने ७७ को झन्डै तेब्बरको संख्यामा हुनेछ ।

निर्वाचन समितिको उप संयोजकमा लक्ष्मण थापा, सदस्यमा राजुभाई मानन्धर र दुई वैकल्पिक सदस्यमा विजय बस्नेत र सागर केसी छन् । त्यस्तै अपिल समितिको सदस्यमा बालकृष्ण श्रेष्ठ, सूर्य नारायण अधिकारी तथा वैकलिप्क सदस्यमा प्रकाश रावल र गंगा सागर छन् ।

निर्वाचन र अपिल समिति साधारण सभाबाटै पास गर्नु पर्ने प्रावधान भएपनि गत महिनाको विशेष साधारण सभामा नराखिएकोले अहिले निर्णय गरेको एन्फाका प्रमुख कार्यकारी अधिकृत इन्द्रमान तुलाधरले जानकारी दिए ।

‘साधारण सभाले निर्णय गर्नुपर्ने थियो । तर गत महिना हाम्रो विधान संसोधन र थ्री स्टारको विषयमा मात्र थियो’ उनले भने, ‘तर निर्वाचनका लागि यी दुवै समिति आवश्यक छन् । त्यसैले निर्णय गर्नुपर्यो । यो निर्णय सबै जिल्ला र क्लबलाई पत्राचार गर्नेछौं । ५० प्रतिशत भन्दा बढीले असहमति जनाएमा पुनः अर्को समिति गठन गर्नुपर्ने हुन्छ नत्र यहि समितिले काम गर्नेछ । ’

तुलाधारले प्रक्रिया अलि लामो हुने भएकाले निर्वाचित केही पछि सार्नु परेको पनि सुनाए । एन्फा केन्द्रिय समितिको पदाधिकारी वा सदस्यका लागि ४० दिन अघि नै उम्मेदवारी दर्ता गर्नुपर्ने वैधानिक व्यवस्था छ ।