कोल्हुवा (हाम्रो खेलकुद) –विमल राना एक्लैले चार गोल गरेको खेलमा विजयी हुँदै देशभक्त युवा क्लब तेस्रो राइनो गोल्डकप फुटबल प्रतियोगिताको क्वार्टरफाइनलमा पुगेको छ ।
आयोजक नन्द भाउजु उपभोक्ता समितिलाई ५–१ ले हराउँदै देशभक्तले नवलपरासीको कोल्हुवामा जारी प्रतियोगिताको अन्तिम आठको यात्रा तय गरेको हो । खेलमा लक्ष्मी हुण्डाई मनाङ मस्र्याङ्दी क्लबबाट व्यवासयिक फुटबल खेल्दै आएका विमल नायक बनेका थिए ।
खेलको छैटौं मिनेटमा नै चुडामणी चौधरीको गोलबाट अग्रता लिएको देशभक्तका लागि विमलले पहिलो हाफमा गोल गरे । दोस्रो हाफमा विमले ३ गोल थपे भने आयोजक टोलीका लागि सागर मल्लले ८० औं मिनेटमा गोल फर्काए ।
प्रतियोगितामा बिहिबार काठमाडौंका दुई टोली ए डिभिजनको सरस्वती क्लब र बी डिभिजनको ब्वाइज युनियनबीच प्रतिस्पर्धा हुने आयोजकले जनाएको छ ।
