म्याड्रिड (एजेन्सी) – रियल म्याड्रिडको यस सिजनमा खराब सुरुवातले एउटा स्ट्राइकरको अभाव देखाएको छ । सो अवस्ठामा प्रिमियर लिगमा राम्रो प्रदर्शन गरिरहेका ह्यारी केनलाई सम्भावित दाबेदार मानिएको छ ।

तर स्पेनिश फुटबल विशेषज्ञ गुलेम बालागले भने क्रिस्टियानो रोनाल्डोले केनलाई रियलमा नचाहने बताएका छन् । स्ट्राइक करिम बेन्जेमा र रोनाल्डोको खराब प्रदर्शनका कारण रियलले अहिले विकल्प सोच्दै गरेको बुझ्न सकिन्छ ।

रियल म्याड्रिडका स्टार तथा महत्त्वपूर्ण खेलाडि भएकाले ट्रान्सफर गतिविधिमा पनि रोनाल्डोको मत हुने गर्छ । त्यसैले रोनाल्डो आफूलाई बेन्जेमासँगै खेल्न सहज मान्ने भएकाले केनलाई रियलमा नचाहेको बालाग बताउँछन् ।

विगत केहि वर्षदेखि बेन्जेमा आफ्नो उत्कृष्ट लयमा छैनन् । उता तर्फ टोटनह्यामका लागि ह्यारी केन भने २०१७ मा लियोनल मेस्सीपछि सर्वाधिक गोलकर्ताको सूचीमा परेका छन् ।

बेन्जेमा र प्रशिक्षक जिनेदे जिदानले यस सिजनको खराब सुरुवातपछि अर्को सिजन क्लब छोड्न सक्ने सम्भावना रहेको छ । तर रियलका अध्यक्ष फ्लोरेन्टिनो पेरेजलाई दुवैको राम्रो साथ भएकाले जिदान र बेन्जेमाले चाहिने जति समय पाउने देखिन्छ ।

केनको टोटनह्यामसँग च्याम्पियन्स लिगमा ३-१ ले हारेको रियल म्याड्रिड यस साता लास पाल्मासँग ३-० ले विजयी रहेको थियो । अब दुई साता पछि रियल ला लिगामा एट्लेटिको म्याड्रिडको सामना गर्दै छ ।