बार्सिलोना (एजेन्सी) – ला लिगाको दोस्रो खेलमा घाइते भएका बार्सिलोनाका फरवार्ड उस्माने डेम्बेले चोटबाट समयमै फर्किने भएका छन् । बार्सिलोनाले यसै वर्ष डेम्बेलेलाई बोरुसिया डर्टमन्डबाट भित्र्याएको थियो ।

डेम्बेले सेप्टेम्बर १६ मा गेटाफे विरुद्धको खेलमा घाइते भएका थिए । उनलाई चिकित्सकले पूर्ण फिट हुन तीन महिनाको समय दिएका थिए । अहिले प्राप्त खबर अनुसार उनी डेसिम्बर २३ मा खेलिने एल क्लासिकोभन्दा पहिले नै फर्किने छन् ।

“उनी मैले सोचेभन्दा छिटो ठिक भईरहेका छन् । यहि गतिले ठिक हुँदै गए भने रियलसँगको खेल उनले भ्याउने छन् । अहिले डेम्बेलेले सतर्कता अप्नाए भने उनी त्यति बेलासम्म फर्किने निश्चित छ,” बार्सिलोनाका चिकित्सक साकारी ओराभाले बताए ।

डेम्बेलेको घुंडामा पहिलेदेखि नै समस्या रहेको तर बार्सिलोनामा खेल्न उनी उत्सुक भएका कारण त्यसको वास्ता नगरेकाले उनले थप समस्या झेल्न परेको समेत साकारीले जनाए ।

बार्सिलोनाले डेम्बेलेलाई लियोनल मेस्सी र लुइस स्वारेजसँग अग्रपंक्तिमा खेलाउन किनेको थियो । तर डेम्बेलेको अनुपस्थितिमा बार्सिलोनालाई उनको अभाव भने खासै खड्केको देखिंदैन ।

११ खेलमा ३१ अंकसहित बार्सिलोना ला लिगाको अंकतालिकाको शीर्ष स्थानमा रहेको छ । बार्सिलोना दोस्रोमा रहेको भ्यालेन्सियाभन्दा ४ अंक तथा आफ्नो प्रतिद्वन्दि रियल म्याड्रिडभन्दा ८ अंकले अगाडि रहेको छ ।