इटहरी (हाम्रो खेलकुद)– इटहरी गोल्डकप फुटबल प्रतियोगिता अब मदन भण्डारी मेमोरियल गोल्डकपका नाममा सञ्चालन हुने भएको छ । प्रतियोगिता यसअघि दानबहादुर स्मृती, हृदयेन्द्र गोल्डकप र पछिल्लो समयमा इटहरी गोल्डकपका नामबाट सञ्चालन हुदै आएको थियो ।
पुनः नाम परिवर्तन गर्दै प्रतियोगिता अब अन्तराष्ट्रिय आमन्त्रण मदन भण्डारी मेमोरियल इटहरी गोल्डकपको नाममा सञ्चालन गर्ने आयोजक राष्ट्रिय जागृती क्लबका अध्यक्ष संजीव ढुंगानाले पत्रकार सम्मेलनमा जानकारी दिए ।
मदन भण्डारी मेमोरियल इटहरी गोल्डकपको पहिलो संस्करण अर्को महिनाको दोस्रो साता आयोजना हुने अध्यक्ष ढुंगानाले जानकारी दिए । इटहरी गोल्ड कपको पुरस्कार राशी मोफसलको सर्वाधिक राशीको हुने बताइएको छ । यसपटकको विजेताले ११ लाख र उप विजेताले ५ लाख रुपैयाँ पुरस्कार प्राप्त गर्नेछन् । यसअघि सर्वाधिक रहेको मेची नेत्रालय काकरभिट्टा गोल्ड कपको विजेताले ८ लाख रुपैयाँ प्राप्त गर्दै आएको छ ।
प्रतियोगिताबारे जानकारी दिन आयोजित कार्यक्रममा राष्ट्रिय खेलकुद परिषद्का सदस्य सचिव केशवकुमार विष्टले इटहरीलाई स्पोर्टर्स सिटी बनाउने अभियानमा प्रतियोगिताले सेतुको काम गर्ने वताउनुभयो । प्रतियोगितामा ए डिभिजन क्लब, स्थानियन, भारतका गरि १० टोलीको सहभागिता रहने बताइएको छ ।
