बार्सिलोना (एजेन्सी) – स्पेनिश लिगको पहिलोमा रहेको बार्सिलोना आज नवौं स्थानमा रहेको सेल्टा भिगोको सामना गर्दै छ । बार्सिलोनाको घरेलु मैदान क्याम्प नुमा खेलिने सो खेल नेपाली समयअनुसार ५.४५ बजे सुरु हुने छ ।
बार्सिलोनाका लागि आज जेरार्ड पिके प्रतिबन्ध पछि लिगमा फर्किँदै छन् । त्यस्तै मिडफिल्डमा पौलिन्होले पाको अल्कासेरको स्थान लिने देखिन्छ । डिफेन्समा एलेक्स भिडालले मौका पाउने सम्भावना छ भने अग्रपंक्ति लियोनल मेस्सी र लुइस स्वारेजले सम्हाल्ने छन् ।
भ्रमणकारी टोलीका लागि जोनी प्रतिबन्धित छन् भने डिफेन्डर सेर्जि गोमेज घाइते छन् । १३ खेलमा ५ जितका साथ सेल्टा भिगोको १७ अंक रहेको छ । त्यस्तै बार्सिलोना भने ३५ अंकका साथ अग्रस्थानमा छ । बार्साले पछिल्ला १८ घरेलु खेलहरु सबैमा जित दर्ता गर्न सफल भएको छ ।
