काठमाडौं (हाम्रो खेलकुद)– अखिल नेपाल फुटबल संघ (एन्फा) को निर्वाचन चैतमा हुने भएको छ । एन्फा केन्द्रिय समितिको आज बसेको बैठकले निर्वाचन दुई तहमा गर्ने र केन्द्रिय निर्वाचन चैत १४ गते गर्ने निर्णय गरेको हो ।

पहिलो चरण अन्तर्गत ४५ जिल्लामा पुस ५ गतेदेखि महिना दिन भित्र गरिसक्ने निर्णय लिएको छ । यसअघि तय निर्वाचन प्रतिनिधि सभा र प्रदेश सभाको निर्वाचनको कारण एन्फाले सार्ने प्रस्ताव विश्व फुटबल महासंघ (फिफा) र एसियाली फुटबल महासंघ (एएफसी) सँग गरेको थियो ।

फिफा र एएफसीले समयानुकुल गर्न अनुमोदन गरेपछि नयाँ मितिमा निर्वाचन निर्णय लिएको एन्फाले विज्ञप्तीमार्फत जानकारी गराएको छ । यसअघि कात्तिक २५ देखि मंसिर २५ गते सम्म जिल्ला संघ र माघ ११ गते केन्द्रिय कार्यसमितिको निर्वाचन गर्ने तय भएको थियो ।

 जिल्ला फुटबल संघको निर्वाचनका लागि निर्वाचन निर्देशिका पनि सोही बैठकले गरेको एन्फाले जनाएको छ । एन्फाका विभिन्न सदस्य समिति फुटबल खेलाडी संघ, फुटबल प्रशिक्षक संघ, फुटबल निर्णायक संघ र महिला संघहरुको निर्वाचन निर्देशिका पनि चाँडै तयार गर्ने निर्णय एन्फाले लिएको छ ।

एन्फा बैठकले अनुमोदन गरेको फिफा फरवार्ड कार्यक्रम अन्तर्गत सञ्चालन गर्ने कार्यक्रम यस्ता छन् ।

१- लिग संचानल (ए,बी र सी डिभिजनका लिग संचालन तथा आयोजना गर्ने)
२- ३ वटा टेक्नीकल सेन्टरहरुको स्तरोन्वोति तथा साधारण मर्मत सम्भार तथा संचालन गर्ने
३- संघ अन्तर्गत रहेका ४५ जिल्लाहरुमा ग्रासरुट कार्यक्रम संचालन गर्ने
४- संघ अन्तर्गत रहेका ४५ जिल्लाहरुमा ग्रासरुट कार्यक्रम संचालन गर्न खेल सामग्रीहरु सहयोग गर्ने
५- एन्फामा सुबिधा सम्पन्न आधुनिक फिजियोथेरापिको समान जडान तथा सुबिधा सम्पन्न एम्बुलेन्स खरिद गर्ने
६- एन्फा कम्प्लेक्स, कार्यालय भवन, सुबिधा सम्पन्न अडोटरीयम हल निर्माण, एन्फा होष्टल तथा ३ वटा एन्फा टेक्निकल सेन्टरमा मर्मत सम्भार तथा रंगरोगन गर्ने

एन्फाको अर्को निर्णय
मध्य तथा सुदुर पश्चिमाञ्चलमा को फुटबल खेलको बिकास गर्न मध्ये तथा सुदुर पश्चिमाञ्चल क्षेत्रको ७ बिभिन्न जिल्लाहरुमा बिशेष ग्रहयता प्रदान गरी ग्रासरुट तथा बिशेष प्याकेजको सम्भाव्यताको अध्ययन गरी कार्यक्रम संचालन गर्ने ।