म्याड्रिड (एजेन्सी) – रियल म्याड्रिडका सुपर स्टार क्रिस्टियानो रोनाल्डोको भविष्यलाई लिएर विभिन्न टिप्पणीहरु आउने गरेका छन् । प्रशिक्षक जिनेदिन जिदान भने क्लबका कीर्तिमानी स्ट्राइकर रोनाल्डोको खेल जीवनको अन्त्य सोही क्लबबाटै भएको हेर्न चाहन्छन् ।
३२ वर्षे रोनाल्डो भविष्यमा पुनः म्यानचेस्टर युनाइटेड फर्किन सक्ने वा करियरको अन्त्यतिर नयाँ अनुभवको खोजीमा रहन सक्ने हल्लाहरु चलिरहँदा जिदानले भने रोनाल्डोले रियलबाट सन्यास लिनुपर्ने बताएका छन् ।
‘रोनाल्डो करियरको अन्त्यसम्म रियलमा बस्नु हाम्रो लागि आवश्यक छ’ , जिदानले क्लब विश्व कप उपाधि जिते पछि पत्रकार सम्मेलनमा भने , ‘रियल नै उनको घर हो । हामी सबैलाई रोनाल्डोले खेलमा पार्न सक्ने प्रभावको अनुभव छ , तसर्थ रोनाल्डो रियलमा बस्नुपर्ने कारण हामीले बुझेका छौं ।’
त्यस्तै क्लब विश्व कपको उपाधि जित्दै नयाँ कीर्तिमान रचेका जिदानले आफ्नो ध्यान अब ला लिगा तर्फ रहेको बताए । उनले भने, ‘हाम्रो ध्यान ला लिगा तर्फ छ । सबैको ध्यान ला लिगामा हुने भएकोलृ हामीले पनि ध्यान दिन आवश्यक छ ।’ २०१७ मा ५ उपाधि जित्दै कीर्तिमान रचेको रियल म्याड्रिडले वर्षको अन्तिम खेलमा बार्सिलोनाको सामना गर्नेछ ।
घरेलु मैदानमा शीर्षस्थानको बार्सिलोनालाई पराजित गर्दै अंक दुरी घटाउने रियलको लक्ष्य रहनेछ । बार्सिलोनाको ३९ अंक छ भने चौथो स्थानमा रियलको ३१ अंक छ । दोस्रो स्थानमा एट्लेटिको म्याड्रिडको ३६ र तेस्रोमा रहेको भ्यालेन्सियको ३४ अंक छ ।
