काठमाडौं (हाम्रो खेलकुद)– नेपाली टोलीले हारबाट साफ यु १५ महिला फुटबल प्रतियोगिताको यात्रा सुरु गरेको छ । बंगलादेशको ढाकास्थित वीरश्रेष्ठ शहिद सिपाही मोहम्मद मुस्ताफा कमल रंगशालामा नेपाली टोली आयोजकसँग ६–० को फराकिलो अन्तरमा पराजित भएको छ ।
बंगलादेशसँगको खेलअघि नेपाली टोली । तस्बिर सौजन्य -एनएसजेएफ
घरेलु टोलीलाई जित दिलाउन तोहुरा खातुनले ह्याट्रिक गरिन् भने अनुचिङ मोगिनीले २ र मोनिका चाक्माले १ गोल गरिन् । मोनिकाको गोलबाट अग्रता लिएको बंगलादेशका लागि अनुचिङले १३ औं र तोहुराले ३२ मिनेटमा गोल गरिन् । पहिलो हाफको इन्जुरी समयको पहिलो मिनेटमा अनुचिङले अर्को गोल गरिन् । तोहुराले ६९ औ. र ७२ औं मिनेटमा गोल गर्दै ह्याट्रिक पुरा गरिन् । अर्को खेलमा भारतले भुटानलाई ३–० ले हराएको छ ।
खेल नेपाली टोलीकी प्रशिक्षक गंगा गुरुङले मिडफन्डको कमजोरीका कारण पराजित हुनु परेको बताइन् । ‘छोटो समयको तयारी भएपनि खेलाडीले सन्तोषजनक प्रदर्शन गरे’, उनले भनिन्, ‘अर्को खेलमा यो भन्दा सुधार गर्नुपर्दछ । भारतविरुद्धको खेलमा नयाँ रणनीतिका साथ उर्तनुपर्ने हुन्छ ।’
बंगलादेशका प्रशिक्षक गोलम रब्बानी छोटोनले खेलाडीले साचेअनुसारको प्रदर्शन गरेको र खेलअघि अन्य देशसंग खेलको मैत्रीपूर्ण खेलका कारण नेपालविरुद्ध खेल्न सजिलो भएको बताए । सहभागी ४ टोलीबीच राउन्ड रोविन लिगपछि शीर्ष २ टोलीले फाइनल खेल्नेछन् । नेपालले पुष ४ गते भारत र पुस ६ गते भुटानको सामना गर्नेछ ।
