म्याड्रिड (एजेन्सी)– रियल म्याड्रिडका मिडफिल्डर टोनी क्रुसले ला लिगाको उपाधि दौड लगभग समाप्त भएकोले अब क्लबले अर्को सिजन च्याम्पियन्स लिगमा छनोट हुने लक्ष्य बनाएर अघि बढ्नु पर्ने बताएका छन् ।
शनिबार भिल्लरियलसँग १–० ले पराजित भएपछि क्रुसले यस्तो प्रतिक्रिया दिएका हुन् । गत सिजन ला लिगा र च्याम्पियन्स लिगको उपाधि जितेको रियलको यो सिजन भने राम्रो हुन सकेन । जारी सिजनमा चौथो स्थानमा रहेको रियल शीर्षस्थानको बार्सिलोना भन्दा १९ अंकले पछाडी परिसकेको छ । भिल्लारियलले पछिल्लो जितपछि रियलसँगको अंक दुरी १ मा झारेको छ ।
उपाधि दौडका विषयमा सोधिएको प्रश्नमा अब शीर्ष चारमा कसरी पर्ने भन्ने लक्ष्य लिनु पर्ने बताएका थिए । ‘हामीले अर्को सिजन च्याम्पियन्स लिगमा छनोट हुने विषयमा सोच्नु पर्दछ,’ जर्मन टोली सदस्य समेत रहेका क्रुसले भने, ‘अहिले हामीले आफ्नो अवस्था बारेमा सोच्नु पर्दछ । बाँकी सिजन कसरी अघि बढ्ने भन्नेमा ध्यान दिन पर्दछ ।’ बार्सिलोनासँगको अंक अन्तर निकै भइसकेकाले अब टोलीले अर्को खेलको बारेमा केन्द्रित हुनु पर्नेमा उनको जोड छ ।
