म्यानचेस्टर (एजेन्सी) – गए राति प्रिमियर लिगमा म्यानचेस्टर युनाइटेडले स्टोक सिटीलाई ३-० ले हराएको छ । यस जितसँगै युनाइटेडले सिटीसँग अग्रस्थानमा दुरी घटाएको पनि छ ।
युनाइटेडका लागि खेलको नवौं मिनेटमा एन्टोनियो भ्यालेन्सियाले गोल गर्दै टोलीलाई अग्रता दिलाएका थिए । त्यस्तै एन्थोनी मार्सियालले पहिलो हाफको ३८ औं मिनेटमा गोल गर्दै घरेलु टोलीको अग्रता दोब्बर बनाएका थिए ।
दुवै गोल मिडफिल्डर पल पोग्बाले असिस्ट गरेका थिए । त्यस्तै दोस्रो हाफमा रोमेलु लुकाकुले थप एक गोल गर्दै युनाइटेडको सहज जित सुनिश्चित गरेका हुन् ।
यस जितसँगै युनाइटेडले सिटीसँगको दुरी १२ अंकमा घटाएको छ । सिटी यसै साता लिभरपुलसँग पराजित भएको हो । युनाइटेड ५० अंकसहित दोस्रो स्थानमा रहेको छ भने पराजित भएको स्टोक सिटी तालिकाको १८ औं स्थानमा रहेको छ ।
