लन्डन (एजेन्सी)– ब्राजिल तथा बार्सिलोनाका पूर्व सुपरस्टार मिडफिल्डर रोनाल्डिन्होले व्यवसायिक फुटबलबाट सन्तयास लिएको उनको एजेन्ट रोबर्टो असीसले जनाएका छन् । व्यवसायी रोबर्टो रोनाल्डिन्होका दाई हुन् ।
सन् २०१५ मा ब्राजिलको क्लब फ्लुमुनेन्स छाडे यता रोनाल्डिन्हो फ्रि एजेन्ट थिए । तर अब ३७ वर्षको उमेरमा उनले सन्यास लिने निर्णय गरेको रोबर्टोले बताएका हुन् । उनको अनुसार रुस विश्व कपपछि ब्राजिल , युरोप र एसियामा केही कार्यक्रम गर्दै उनको सन्यासलाई औपचारिकता दिने उनीहरुको योजना छ ।
ब्राजिलियन क्लब ग्रेमियोबाट व्यवसायिक फुटबल सुरु गरेका रोनाल्डिन्हो पिएसजी , मिलान र बार्सिलोना लगायतका क्लबबाट खेले । बार्सिलोनामा ५ वर्ष बिताउँदै उनले २ सय ७ खेल खेले जसमा ९७ गोल गरे । ब्राजिलको राष्ट्रिय टोलीबाट उनको ९७ खेलमा ३३ गोल गरेका छन् ।ब्राजिलबाट २००२ को विश्व कप , बार्सिलोनाबाट २००६ को च्याम्पियन्स लिग जितेका उनले २००५ को ब्यालोन डी ओर उपाधि हात पारेका थिए ।
