इटहरी (हाम्रो खेलकुद) – जारी अन्तराष्ट्रिय आमन्त्रण मदन भण्डारी स्मृति इटहरी गोल्ड कप – २०७४ को पहिलो सेमिफाइनल खेलमा थ्री स्टार क्लबले त्रिभुवन आर्मीलाई हराउँदै फाइनलमा स्थान सुरक्षित गरेको छ ।
निर्धारित समय १-१ म टुङ्गिएपछि खेल पेनाल्टीमा पुगेको थियो । पेनाल्टीमा थ्री स्टारले यस सिजनको सर्वाधिक सफल क्लब आर्मीलाई ५-३ ले हराउन सफल रह्यो ।
आर्मीका लागि नवयुग श्रेष्ठले खेलको २५ औं मिनेटमा गोल गर्दै टोलीलाई अग्रता दिलाएका थिए । तर थ्री स्टारका स्ट्राइकर अजयी मार्टिनले खेलको ५७ औं मिनेटमा गोल गर्दै टोलीलाई खेलमा फर्काएका थिए । नियमित समयमा अन्य गोल हुन नसक्दा खेल पेनाल्टीमा पुगेको थियो ।
पेनाल्टिमा थ्री स्टारका पाँचैं खेलाडिहरुले आफ्नो प्रहार गोलमा परिणत गरे भने आर्मीका एरिक विष्ट चुक्दा खेल थ्री स्टारको पक्ष्यमा पुगेको हो । थ्री स्टारका लागि रजिन सुब्बा, बुद्ध चेम्जोङ, निराजन खड्का, सुनिल बाल र अनन्त तामाङ गोल गर्न सफल भएका थिए भने आर्मीका नवयुग श्रेष्ठ, सन्तोष तामाङ र दिप लामाले पनि आफ्नो पेनाल्टीलाइ गोलमा परिणत गरेका थिए ।
खेलको ‘म्यान अफ द म्याच’ थ्री स्टारका पिटर सेगुन भए । उनले ट्रफीसहित नगद १० हजार प्राप्त गरे । अब थ्री स्टारले फाइनलमा भारतीय क्लब गेरिफा र मनाङ बीचको सेमिफाइनलको विजेतासँग भिड्ने छ ।
प्रातियोगिताको खेल तालिका र अहिलेसम्मको नतिजा हेर्नुहोस ।
