लण्डन (एजेन्सी) – इङ्ग्लिस लिग कप (काराबाओ कप) मा आर्सनलले चेल्सीलाई सेमिफाइनलको दोस्रो लेगमा २-१ ले पराजित गर्दै फाइनलमा स्थान सुरक्षित गरेको छ ।

पहिलो लेगमा आर्सनलले चेल्सीलाई उसको घरेलु मैदान स्ट्यामफोर्ड ब्रिजमा गोलरहित बराबरीमा रोकेको थियो । गए रातिको २-१ को जितसँगै आर्सनलले एग्रिगेटमा २-१ को जित हांसिल गर्दै फाइनल प्रवेश गरेको हो ।

चेल्सीका लागि एडेन हाजार्डले खेलको सातौं मिनेटमा गोल गर्दै टोलीलाई अग्रता दिलाएका थिए । तर त्यसपछि आर्सनलले खेल पुरै उल्टाउन सफल भएको हो । खेलको १२ औं मिनेटमा डिफेन्डर नाचो मोनरियालको हेडर चेल्सीका एन्टोनिओ रुडिगरलाई लागेर पोस्टको दिशा लिएपछि खेल बराबरीमा पुगेको थियो ।

त्यस्तै दोस्रो हाफमा आर्सनलले एक गोल थप्दै जित सुनिश्चित गरेको थियो । एलेक्जान्डर लाकाजेटको डिफ्लेक्ट भएको पास मिडफिल्डर ग्रानिट जाकाले गोलमा परिणत गर्दै चेल्सीलाई निराश बनाएका थिए ।

त्यस्तै प्रिमियर लिगको शीर्ष स्थानमा रहेको म्यानचेस्टर सिटीले पनि सेमिफाइनल खेलमा ब्रिस्टोल सिटीलाई ३-२ ले पराजित गर्दै आर्सनलसँगको फाइनल भेट पक्का गरेको हो । सिटीले ब्रिस्टोललाई ३-२ ले हराउँदा उसका लेरोय साने, सर्जियो अगुएरो र केभिन डे ब्रुयनले गोल गरेका थिए । सिटीले पहिलो लेग पनि २-१ ले जितेको थियो ।