पोखरा (हाम्रो खेलकुद) – आदित्य चौधरीको पहिलो हाफको गोलमा एपिएफले आहा-रारा गोल्ड कपमा संकटालाई पराजित गरेको छ । आदित्यले फ्री किक मार्फत खेलको एकमात्र गोल गरे ।

तस्बिर: विवेक सुवेदी / हाम्रो खेलकुद

एपिएफले पहिलो हाफमा खेललाई नियन्त्रणमा राखेको थियो । तुलानात्मक रुपमा बलियो देखिएको एपिएफले २८ औं मिनेटमा आदित्यको फ्री किक मार्फत अग्रता लियो । बक्स नजिकबाट गरेको प्रहार क्रसबारमा ठोकिँदै गोलमा परिणत भएको थियो ।

काउन्टर एट्याकमा व्यस्त देखिएको संकटाले ३९ औं मिनेटमा बराबरी गर्ने सुवर्ण अवसर गुमायो । थ्री स्टारका पूर्व खेलाडी प्रकाश बुढाथोकीको क्रसमा थ्री स्टारका अर्का पूर्व स्ट्राइकर अनिल गुरुङले फ्री हेडरमा कनेक्ट गर्न सकेनन् । पहिलो हाफको अन्त्य अघि ४१ औं मिनेटमा नबिन लामाले बक्सबाट गरेको प्रहारलाई बाँयामा डाइभ गरेर संकटाको गोल किपर विनय श्रेष्ठले रोके ।

दोस्रो हाफमा सुधारिएको प्रदर्शन गरेपनि संकटाले गोल गर्न भने सकेन । ७४ औं मिनेटमा हेमन्त थापा मगरले दिएको पासलाई मनाङ्गका पूर्व खेलाडी रुपेश केसीले टच गर्न नसकेपछि संकटाले अर्को राम्रो अवसर गुमायो । त्यसअघि ५९ औं मिनेटमा एपिएफका फरवार्ड युवराज खड्कालाई गोल किपर विनयले वन-अन-वनमा रोकेका थिए । एपिएफले ८० औं मिनेटमा अन्जनको राम्रो प्रहार मार्फत अग्रता दोब्बर गर्ने अवसर पाए पनि विनयले अन्जनको २५ यार्ड टाढाको प्रहार डाइभ गर्दै रोकेका थिए ।

प्रतियोगिताको तालिका र अहिलेसम्मको सबै नतिजाहरु हेर्नुहोस