काठमाडौं (हाम्रो खेलकुद)– मोफसलको नकआउट फुटबल प्रतियोगितामध्ये मदन भण्डारी स्मृति इटहरी गोल्ड कप प्रतियोगितको फाइनल वर्षकै उच्च रोमाञ्चक खेल हुने अनुमान गर्न सकिन्छ । जहाँ घरेलु फुटबलमा लामो र सफल इतिहास बोकेका दुई टोली लक्ष्मी हुन्डाई मनाङ मस्र्याङ्दी क्लब र रुस्लान थ्री स्टार क्लबबीच प्रतिस्पर्धा हुँदैछ ।

प्रि म्याच कन्फ्रेन्समा उपाधिका साथ दायाँबाट क्रमश : थ्री स्टार प्रशिक्षक मेघराज केसी, कप्तान विक्रम लामा, मनाङ कप्तान अनिल गुरुङ र प्रशिक्षक छिरिङ लोप्साङ । तस्बिर : दीलिप राईको फेसबुकबाट

यद्दपी यी दुई टोली झन्डै २ वर्षपछि एकअर्कोको सामना गर्दैछन् । २०७२ को राष्ट्रिय लिगयता यी दुई टोलीबीच प्रतिस्पर्धा भएको छैन । यद्दपी त्यसयता थ्री स्टारले भने  मैदान बाहिर रहनुपर्ने परिस्थिति सृजना भयो । तर, यो बीचमा मनाङले आफुलाई घरेलु फुटबलमा मात्र व्यस्त राखेन गत वर्ष बंगलादेशमा भएको शेख कमल अन्तर्राष्ट्रिय क्लब च्याम्पियनसिपमा भाग लिएको थियो ।

घरलु फुटबलमा गत वर्ष सर्वाधिक ४ वटा नकआउट फुटबलको उपाधि जितेको मनाङले यो वर्ष पनि ४ वटा फाइनल खेल्दा २ वटा उपाधि उचालिसकेको छ । मनाङको यो वर्षको पाँचौं फाइनल हो । चितवनमा जेसिज कप र दुहबी गोल्ड कपको उपाधि जितेको मनाङ सताक्षी गोल्डकप र मेची नेत्रालय काकरभिट्टा गोल्ड कपको फाइनलमा भने विभागिय टोली त्रिभुवन आर्मी क्लबसँग पराजित भएको थियो ।

पुनरागमनपछिको पहिलो प्रतियोगितामा क्वार्टरफाइनल भन्दा अघि बढ्न नसकेको थ्री स्टारले इटहरीमा भने सन्तोषजनक प्रदर्शन गरेको छ । धनगढीमा नेपाल आइस सुदूरपश्चिम खप्तड गोल्ड कपको क्वार्टरफाइनलमा आर्मीसँग पराजित थ्री स्टारले यसपटक त्यहि आर्मीलाई सेमिफाइनलमा आर्मीलाई हराएको थियो । जसले टोलीलाई उपाधिको दाबेदार मान्न सकिन्छ ।

२०७२ को राष्ट्रिय लिगको च्याम्पियनका हैसियतमा एएफसी कपको पहिलो चरण पार गरेपनि अखिल नेपाल फुटबल संघ (एन्फा) को गल्तिका कारण थ्री स्टारले दोस्रो चरण खेल्न पाएन । जसको विरोध स्वरुप थ्री स्टारले ६ करोड रुपैयाँ क्षेतिपूर्ति माग गर्दै एन्फाले आयोजना गर्ने र स्वकृति प्रतियोगिता नखेल्ने निर्णय गर्यो । जसका कारण टोलीले कुनै पनि घरेलु प्रतियोगिता खेलेन ।

अन्ततः १ करोड ५० लाख रुपैयाँ क्षेतिपूर्ति दिन एन्फाको विशेष साधारण सभाले निर्णय गरेपछि थ्री स्टार घरेलु फुटबलमा गत महिना फर्केको थियो । थ्री स्टारमा एलेन न्यौपानेले पोस्ट सम्हाल्दै आएका छन् भने यो सिजन राष्ट्रिय टोलीका दुई युवा खेलाडी विमल घर्ती मगर र अनन्त तामाङ आबद्ध टोलीमा आबद्ध भएका छन् । कप्तान विक्रम लामा, निराजन खड्का, विजय धिमाल, रजिन जस्ता खेलाडी टोलीका मुख्य खेलाडी अहिले पनि छन् । केही विदेशी खेलाडीका कारण थ्री स्टार बलियो मानिएको छ ।

राष्ट्रिय टोलीका पूर्व कप्तान अनिल गुरुङको नेतृत्वमाम रहेको मनाङमा केहि विदेशी खेलाडीका साथै पछिल्लो खेलबाट सन्तोष साहुखल थपिएका छन् । झन्डै दुई वर्षदेखि जापान बस्दै आएका सन्तोष केहि दिनअघि स्वदेश फर्केर इटहरी पुगेका थिए । सुजल श्रेष्ठ, विशाल राई, विराज महर्जन जस्ता खेलाडी मनाङका महत्वपूर्ण सदस्य छन् नै । टोलीको पोष्ट दीनेश थापामगरले सम्हाल्दै आएका छन् ।

मनाङका प्रशिक्षक छिरिङ लोप्साङले फाइनल खेल्न टोली उत्साहित रहेको बताएका छन् । ‘थ्री स्टार राम्रो टोली हो र उनीहरु बलियो टोली हुन्’, शुक्रबारको प्रि म्याच कन्फ्रेन्समा उनले भने, ‘सन्तोषको उपस्थितिले हामीलाई थप उर्जा दिएको छ । हामीले मेहेनत गरेर खेल्नु पर्दछ र मौकामा गोल गर्नुपर्दछ ।’ सन्तोष जानुअघि थ्री स्टारमा आबद्ध थिए ।

अर्को तिर थ्री स्टारका प्रशिक्षक मेघराज केसीले पनि टोलीका लागि फाइनल महत्वपूर्ण रहेको बताए । ‘हामी डेढ वर्षपछि फुटबलमा फर्केका छौं’, उनले भने, ‘त्यसकारण समर्थकलाई खुसी पार्न पनि हामीलाई उपाधिको आवश्यकता छ । फाइनल पक्कै कठिन हुनेछ । तर, उत्कृष्ट प्रदर्शनका साथ उपाधि जित्ने हाम्रो योजना छ ।’

प्रतियोगिताको विजेताले १२ लाख रुपैयाँ उपविजेताले ६ लाख रुपैयाँ प्राप्त गर्नेछ भने सर्वौत्कृष्ट खेलाडीले मोटरसाइकल पाउनेछन् । पुरस्कार राशी मोफसलको नकआउट फुटबलको वर्षकै सबैभन्दा ठूलो धनराशीको पुरस्कार हो ।