इटहरी (हाम्रो खेलकुद)– झन्डै डेढ वर्षपछि घरेलु फुटबलमा पुनरागमन गरेको रुस्लान थ्री स्टार क्लबले मदन भण्डारी स्मृति इटहरी गोल्डकप फुटबल प्रतियोगिताको उपाधि जितेको छ । लक्ष्मी हुन्डाई मनाङ मस्र्याङ्दी क्लबलाई १–० ले हराउँदै थ्री स्टारले उपाधि जितेको हो ।
बुद्ध चेम्जोङले ३७ औं मिनेटमा गरेका गोलको अग्रतालाई जोगाउँदै थ्री स्टारले मोफसलको सर्वाधिक पुरस्कार राशीको इटहरी गोल्ड कप जितेको हो । एन्फासँगको कमजोरीका विरुद्ध झन्डै डेढ वर्षपछि फुटबलमा फर्केको थ्री स्टारले दोस्रो सहभागितामा उपाधि जित्न सफल भएको हो ।
यसै महिना धनगढीमा भएको नेपाल आइस सुदूरपश्चिमाञ्चल गोल्ड कपमा टोली क्वार्टरफाइनलबाट बाहिरिएको थियो । मनाङको हकमा भने यो वर्षको पाँचौं फाइनल थियो । टोलीले २ उपाधि जित्दा तीनमा उपविजेतामा चित्त बुझाउनुपर्यो ।
