म्याड्रिड (एजेन्सी) – रियल म्याड्रिडका स्टार खेलाडि क्रिस्टियानो रोनाल्डोको क्लब छोड्ने हल्ला केहि समययता निकै चर्चामा रहेको छ । त्यस हल्ला माझ रोनाल्डोले आफ्नो प्रतिक्रिया पनि दिएका छन् ।
रोनाल्डोले आफू रियल म्याड्रिडमा खुसी रहेकाले क्लबमै बस्ने जनाएका छन् । यस सिजन राम्रो लयमा नरहेका रोनाल्डोले अर्को सिजनका लागि म्यानचेस्टर युनाइटेड जान सक्ने विभिन्न समाचारमा बताइएको थियो ।
रोनाल्डोको रियलसँग सम्झौता २०२१ सम्म रहेको छ । क्लबले नयाँ सम्झौताको विषयमा सल्लाह नगरे पनि रोनाल्डोले आफू रियलमै बस्न तयार रहेको बताएका छन् ।
“म यहिं बस्न चाहन्छु । मलाई यो शहर मन पर्छ र यो क्लबप्रति मेरो लगाव छ । पोर्चुगल पनि यहाँबाट जान-आउन सजिलो छ ,” रोनाल्डोले हालै जनाएका थिए ।
खेल जीवनपछि उनको योजनाको बारेमा सोध्दा उनले भने, “म ४१ वर्षको उमेरमा अवकाश लिन चाहन्छु तर त्यो अहिलेको समयमा अलि गाह्रो हुन सक्छ । प्रशिक्षक हुने कुरा चाहिं मैले अहिलेसम्म सोचेको छैन ।”
