अर्जुन कार्की
बागलुङ– बागलुङमा सुरु भएको प्रदेश नम्बर ४ स्तरीय प्रथम मेयर कप फुटबलमा आयोजकले विजयी सुरुवात गरेको छ । बाङ्गेचौर खेलमैदानमा भएको उद्घाटन खेलमा पालुङटार नगरपालिकालाई पेनाल्टी सुट आउटमा ३–४ गोल अन्तरले हराउँदै आयोजक बागलुङ नगरपालिका क्वाटरफाइनलमा पुगेको छ ।

निर्धारित समयमा र थप समयमा ३–३ को बराबरीपछि खेल पेनाल्टीमा गएको थियो । आठौं मिनेटमा आशिष केसीको गोलबाट बागलुङले अग्रता लिएपनि औं २२ मिनेटमा पालुङटारका फरवार्ड जुद्धकुमार गुरुङले अनमार्क रहेको अवस्थामा बराबरी गोल फर्काए । ५० औं मिनेटमा गोलकिपरबाट रिबाउन्ड भएको बलमा सुनिल बस्यालले गोल गर्दै पालुङटारलाई २–१ को अग्रता दिलाए ।

६० औं मिनेटमा कप्तान प्रमेश थापाले गोल गर्दै खेललाई २–२ को बराबरीमा पुर्याए । त्यसपछि खेलमा २० मिनेट समय थप गरिएको थियो । थप समयको ११ औं मिनेटमा जित कार्कीको पासमा बागलुङका प्रमल थापाले हेडमार्फत गोल गरे । त्यसको २ मिनेट बित्द नपाउँदै पालुङटारका जुद्धकुमार गुरुङको फ्रिकिकमा प्रविणकुमार गुरुङले बराबरी गोल गरे ।

पेनाल्टी सुटआउटमा पालुङटारका जुद्ध कुमार गुरुङ, विजय विक र सागर खत्रीले गोल गरे भने प्रविन कुमार गुरुङ र विजय भटको प्रहार म्यान अफदि म्याच घोषित बागलुङका गोलकिपर रुपेश बोहोराले विफल पारिदिएका थिए । बागलुङका युगेस थापा, निसान थापा, कमल थापा र प्रमेश थापाले गोल गरे । जितेन्द्र काकर्कीको प्रहार बाहिरिएको थियो ।

पालुङटारका प्रशिक्षक विकास तामाङले आफुहरुलाई प्रतियोगिताको बारेमा ढिलो जानकारी भएको र टिम व्यवस्थापन गर्न गाह्रो भएकाले खेल हार्न पुगेको बताए । उनुभयो । २ दिनको तयारीले खेल्नु पर्दा प्रदर्शन सोचे अनुरुप हुन कठिन हुने उनको भनाई थियो ।

यस्तै बागलुङ नगरपालिकाका प्रशिक्षक भिम बहादुर बोहोराले आफ्ना खेलाडीहरु काठमाडौं र अन्य क्षेत्रमा छरिएर खेल्ने गरेको र खेलमा सन्तुलन हुन नसकेको बताए । मिडफिल्डमा केही समस्या देखिएकाले आउने खेलमा सुधार हुने बोहोराको भनाई थियो ।

नकआउट प्रतियोगितामा प्रदेश नम्बर ४ का ११ नगरपालिकाको सहभागिता रहेको छ । प्रतियोगितामा बुधबार भकुण्डे खेलमैदानमा कुश्मा नगरपालिका पर्वत र गल्कोट नगरपालिका बागलुङबीच प्रतिस्पर्धा हुने जिल्ला फुटबल संघ बागलुङका अध्यक्ष रामराज गुरुङले जानकारी दिए ।

प्रतियोगिताको विजेताले २ लाख २२ हजार २ सय २२ र दास्रो हुने टोलीले १ लाख ११ हजार १ सय ११ रुपैयाँ प्राप्त गर्नेछ । प्रतियोगिताको उत्कृष्ट खेलाडीले १० हजार र उत्कृष्ट गोलरक्षक, डिफेन्डर, मिडफिल्डर, स्ट्राईकर र प्रशिक्षकले समान ५ हजार रुपैयाँ पाउने बताइएको छ ।