अर्जुन कार्की
बागलुङ– कास्कीको पोखरा लेखनाथ महानगरपालिका कास्की र स्याङ्जाको वालिङ नगरपालिका बागलुङमा जारी प्रदेश नम्बर ४ स्तरीय मेयर कप फुटबलको सेमिफाइनलमा पुगेका छन् । कुश्मा नगरपालिकालाई ६–० ले हराउँदै पोखरा लेखनाथ अन्तिम चारमा पुगेको हो । वालिङले म्याग्दी बेनी नगरपालिकालाई २–० ले पराजित गरेको थियो ।
२२ औं मिनेटमा विनोद गुरुङको गोलबाट अग्रता लिएको पोखराका लागि विजय श्रेष्ठले ३२ औं मिनेटमा अर्को गोल गरे । ६० औं मिनेटमा मान बहादुर तामाङले गोल गरे । प्रतियोगिताकै पहिलो ह्याट्रिक गर्ने क्रममा पोखराका भिषण गुरुङले ६४ औं, ६६ औं र ७९ औं मिनेटमा गोल गरे ।
अर्को खेलमा वालिङका लागि को लागि ४८ औं मिनेटमा सफल थापा र ६८ औं मिनेटमा अजिज दिन मियाँले गोल गरेका थिए । नकआउटका आधारमा जारी प्रतियोगितामा शुक्रबार सेमिफाइनल खेल हुने आयोजक बागलुङ नगरपालिकाले जनाएको छ । गोरखा नगरपालिका र पोखरा लेखनाथबीच पहिलो तथा तनहुँको व्यास नगरपालिका र वालिङबीचप्रतिस्पर्धा हुने जिल्ला फुटबल संघ बागलुङका अध्यक्ष रामराज गुरुङले जानकारी दिए ।
मेयर कपको विजेता टोलीले २ लाख २२ हजार २ सय २२ तथा दोस्रो हुने टोलीले १ लाख ११ हजार १ सय ११ रुपैयाँ प्राप्त गर्नेछ । प्रतियोगिताका सर्वोत्कृष्ट खेलाडीले १० तथा उत्कृष्ट गोलरक्षक, रक्षक, मिडफिल्ड, स्ट्राइकर र प्रशिक्षकले सम्मान ५ हजार रुपैयाँ प्राप्त गर्नेछन् ।
