धरान (हाम्रो खेलकुद)– राष्ट्रिय फुटबल टोलीका पूर्व स्ट्राइकर कर्ण लिम्बु २० औं बुढासुब्बा गोल्डकप फुटबल प्रतियोगिता लक्ष्मी हुन्डाई मनाङ मस्र्याङ्दी क्लबबाट खेल्ने भएका छन् । आज हुने सिएमजी क्लब संकटासँगको खेलमा झापाका कर्ण उत्रने मनाङका प्रशिक्षक छिरिङ लोप्साङले हाम्रो खेलकुद डट कमलाई जानकारी दिएका छन् ।

पोखराको सहारा गोल्डकपको क्वार्टरफाइनलमा नेपाल पुलिससँग स्तब्ध हुँदै धरान पुगेको थियो । संकटा पनि आहा गोल्डकपको पहिलो खेलमा एपिएफसँग पराजित भएर धरान पुगेको थियो । मनाङ र संकटाका प्रशिक्षक दुवैले सफल सुरुवात गर्ने विश्वास लिएका छन् ।

मनाङका प्रशिक्षक लोप्साङ लगातारको प्रतियोगिताले खेलाडी केहि थाके जस्तो भएपछि उच्च मनोबलका साथ बुढासुब्बामा उतर्ने तयारीमा रहेको बताए । ‘लगातारको प्रतियोगिताले खेलाडीमा केहि थकान त छ’, उनले भने, ‘तर, यसअघि वर्क परमिट स्वीकृति पाएपछि दुई विदेशी र कर्ण लिम्बु आज खेल्नेछन् । जसले हामी थप बलियो भएका छौं ।’ इटहरी गोल्डकप र आहा रारा गोल्डकप खेलेका राष्ट्रिय टोलीका पूर्व स्ट्राइकर सन्तोष साहुखल भने आजको खेलमा नहुने लोप्साङले जानकारी दिए ।

संकटाका प्रशिक्षक सल्याण खड्गीले तयारी सन्तोषजनक रहेकोले सफल हुने विश्वास गरे । ‘पोखरामा खेले भन्दा दुई विदेशी खेलाडी थपिएका छन्’, उनले भने, ‘त्यसैले सफल नतिजाको आशा राखेका छौं ।’गत वर्ष नकआउटको सर्वाधिक उपाधि जितेको मनाङले यो वर्ष २ वटा उपाधि जितेको थियो भने ३ वटामा उपविजेतामा चित्त बुझाएको थियो ।

मनाङले चितवनमा जेसिज कप र गत महिना दुहवी गोल्डकप जितेको थियो । टोली झापाको सताक्षी गोल्डकप र मेची नेत्रालय काकरभिट्टा गोल्डकप तथा मदन भण्डारी स्मृति इटहरी गोल्डकपको फाइनलमा पराजित भएको थियो । सताक्षी र काकरभिट्टामा त्रिभुवन आर्मी क्लब र इटहरी कपमा रुस्लान थ्री स्टार क्लबसँग पराजित भएको थियो ।

८ टोलीको सहभागिता रहेको बुढासुब्बाको दोस्रो खेलमा आइतबार आयोजक धरान र भारतको दुर्गापुर स्टिलबीच हुनेछ । त्यस्तै सोमबार तेस्रो खेलमा नेपाल पुलिस र झापा ११ ले एकअर्काको सामाना गर्नेछन् । पुलिस शनिबार आहा गोल्डकपको फाइनल खेलेर धरान पुग्नेछ । त्यस्तै आहा गोल्डकपको फाइनल पुगेको अर्को टोली रुस्लान थ्री स्टार क्लबबीच माघ २३ गते हुनेछ ।

मनाङ र संकटाबीचको विजेताले झापा र पुलिसबीचको विजेतासँग माघ २४ गते पहिलो सेमिफाइनल खेल्नेछ । त्यस्तै धरान र दुर्गापुरबीचको विजेताले थ्री स्टार र सुदूरपश्चिम ११ बीचको विजेताको माघ २५ गते सामना गर्नेछ । फाइनल माघ २७ गते हुने आयोजक धरानले जनाएको छ ।