म्युनिख (एजेन्सी)– जर्मन बुन्डेसलिगा च्याम्पियन बायर्न म्युनिखले रियल म्याड्रिडका स्टार हामेस रोड्रिगेजलाई स्थायी रुपमै क्लबमा राख्ने इच्छा देखाएको छ । लोनमा रहेका रोड्रिगेजले क्लबमा उच्च प्रदर्शन गरिरहेका कारण म्युनिख उनलाई लामो समय आफ्नै टोलीमा राख्न चाहेको हो ।
कोलम्बियन स्टार सिजनको सुरुआतमा २ वर्षका लागि रियलबाट लोनमा म्युनिख पुगेका थिए । त्यहाँ पुगेयता २४ खेल खेल्ने क्रममा क्लबलाई प्रभावित गरेका छन् । बायर्नसँग उनलाई स्थायी रुपमा आफ्नो सदस्य बनाउने विकल्प पनि छ । त्यसका लागि टोलीले ३५ मिलियन युरो रियललाई तिर्नुपर्ने हुन्छ । जसरी उनी प्रतिको चासो बढेको छ त्यस हिसाबले उनी ढिलो चाडो टोलीको स्थायी सदस्य बन्ने देखिन्छ ।
जर्मन टोलीले सुरुमा रियललाई १० मिलियन युरो तिर्ने सहमतिमा दुई वर्षको लोन सम्झौता गरेको थियो । यस बीचमा सहमति भन्दा फरक गर्न परेमा ३५ मिलियन युरो र त्यसमा ८ मिलियन पारिश्रमिक थप्ने पनि उल्लेख गरिएको थियो । मोनाकोबाट सन् २०१४ मा रियल पुगेका रोड्रिगेजले जिनेदिन जिदानको टोलीमा पनि उच्च प्रदर्शन गरेका थिए । तर, अहिलेको प्रणालीमा उनी नसमेटिएपछि उनी जर्मनी लागेका थिए ।
