म्यानचेस्टर (एजेन्सी) – म्यानचेस्टर युनाइटेडका स्टार गोलकिपर डेभिड डे गेयालाई केहि सिजनदेखि समाचारहरुले रियल म्याड्रिडसँग जोडिरहेको छ । यसबीच उनको सरुवामा अहिले ठूलो मोड आएको छ ।

डे गेयालाई अहिले विश्व फुटबलमा नम्बर १ गोलकिपर मानिन्छ । कारण, उनको निरन्तरको उच्च प्रदर्शन जुन उनले यसै साता सेभियाविरुद्ध च्याम्पियन्स लिगमा पनि देखाए ।

यसै कारण साविक च्याम्पियन्स लिग तथा ला लिगा विजेता रियल म्याड्रिड डे गेयालाई भित्राउन इच्छुक रहेको छ । तर अहिले उनको यस सरुवामा नयाँ खुलासा आएको छ ।

इएसपिएनका अनुसार म्यानचेस्टर युनाइटेडले डे गेयालाई नयाँ सम्झौतामा बाध्न गइरहेको छ र युनाइटेड यसो गर्न सफल रहे उनी कम्तीमा अझै ५ वर्ष सोही क्लबमा रहने छन् ।

डे गेया सन् २०१५ मा रियल जान एकदमै नजिक थिए र त्यसपछि उनको रियल जाने चर्चा झन भन्दा झन बढ्दै छ । २०११ मा युनाइटेड आएका डे गेयाले त्यहाँ प्रिमियर लिग, एफए कप र युरोपा लिग जितिसकेका छन् । तर च्याम्पियन्स लिगको सपना पुरा गर्न उनी रियल जान सक्ने अनुमान गरिएको छ ।

रियल डे गेयालाई लिएर कति गम्भीर छ र कति छिटो प्रतिक्रिया जनाउँछ त्यसमा उनको सरुवामा ठूलो असर गर्ने छ । युनाइटेडसँग डे गेयाले सम्झौतामा हस्ताक्षर गरिहाले भने रियल डे गेया जस्ता प्रभावशाली गोलकिपरबाट बञ्चित हुने छ ।