लण्डन (एजेन्सी) – इंग्लिस लिग कप अन्तर्गत फाइनल खेलमा आज आर्सनल र म्यानचेस्टर सिटी वेम्ब्ली स्टेडियममा भिड्दै छन् । नेपाली समय अनुसार सो खेल १०.१५ बजे सुरु हुने छ ।
सिटीका प्रशिक्षक पेप ग्वार्डिओलाले आज गोलकिपरको स्थानमा क्लाउडियो ब्राभोलाई खेलाउने बताएका छन् । सिटीका लागि फाबियन डेल्फ निलम्बित छन्। त्यस्तै युवा फरवार्ड ग्याब्रियल जेससा पूर्ण फिट नरहे पनि बेन्चमा स्थान पाउने सम्भावना रहेको छ ।
अर्को तर्फ आर्सनलका लागि डेभिड ओस्पिनाले गोलपोस्ट सम्हाल्ने छन् । आरोन राम्सी र मेसुट ओजिल फिट हुँदै सुरुवाती ११ मा फर्किने सम्भावना धेरै छ । त्यस्तै हेनरिक मिखितार्यन ‘कप-टाइड’ रहेकाले खेलमा सहभागी हुने छैनन् ।
यी दुई बीच खेलिएको पछिल्लो खेलमा म्यानचेस्टर सिटी ३-१ ले विजयी रहेको थियो तर वेम्ब्लीमा खेलिएको पछिल्लो खेलमा भने आर्सनलले २-१ को जित दर्ता गर्न सफल भएको थियो ।
