म्याड्रिड (एजेन्सी)– रियल म्याड्रिडका महान खेलाडी राउल गोन्जालेजले जिनेदिन जिदानले क्लबको प्रशिक्षणमा निरन्तरता दिनुपर्ने बताएका छन् । स्पेनिस राउलको नजरमा जिदान रियलका लागि सहि प्रशिक्षक हुन् ।
ला लिगामा रियलले कमजोर प्रदर्शन गरेयता जिदानको आलोचना सुरु भएको थियो र उनी बर्खास्तमा पर्न सक्ने अनुमान गरिदै आएको छ । तर, लगातार दुई पटक रियललाई युरोपियन च्याम्पियन बनाएका जिदानको टोलीले च्याम्पियन्स लिगमा भने यो सिजनमा पनि उच्च प्रदर्शन गरिरहेको छ । पेरिस सेन्ट जर्मेन (पिएसजी) विरुद्ध च्याम्पियन्स लिगको अन्तिम १६ को पहिलो लेगमा रियलले ३–१ को अग्रता लिएको छ । यी दुई टोलीबीचको दोस्रो लेग ७ मार्चमा हुँदैछ ।
राउलले भनेका छन्, ‘जिजु साच्चै अदभुत छन् । रियलका लागि उनी उत्कृष्ट प्रशिक्षक हुन् । हाी चाहान्छौं भविष्यमा पनि उनले निरन्तरता दिउन् । उनले पछिल्लो दुई वर्ष सफल नेतृत्व गरिसकेका छन् । दुई पटक च्याम्पियन्स लिग र एउटा ला लिगा उपाधि जिताएका छन् र भविष्यमा अझै उपाधि दिलाउने छन् ।’
राउलले क्रिस्टियानो रोनाल्डोको पक्षमा समेत मत जाहेर गरेका छन् । ‘उनी फुटबल इतिहासका उत्कृष्ट मध्येका एक खेलाडी हुन्,’ उनले भने,’ उनले हरेक खेल, हरेक सिजन गोल गरेका छन् । यो सिजन पनि उनले ३० गोल गरिसकेका छन् । उनी इतिहासका सफल खेलाडी मध्येका एक हुन् ।’
