काठमाडौं (हाम्रो खेलकुद) – अखिल नेपाल फुटबल संघ (एन्फा) ले राष्ट्रिय फुटबल टोलीका प्रशिक्षक ग्योतोकु  कोजी र टेक्निकल डाइरेक्टर ताकेदा चियाकीसँगको सम्झौता १ वर्ष नवीकरण गरेको छ । 

२ वर्षअघि नेपाली टोलीको प्रशिक्षकका रुपमा नियुक्त भएका कोजी र टेक्निकल डाइरेक्टर चियाकीसँगको दुई वर्षे सम्झौताको अन्त्यसंगै एन्फाले सम्झौता नवीकरण गरेको हो । जापानी राजदुताबासमा गरेको पत्रकार सम्मेलनमा एन्फाले सम्झौता सार्वजनिक गरेको हो ।

‘हामीले साफ च्याम्पियनसीप जित्ने लक्ष्य राखेका छौं ‘ ,  पत्रकार सम्मेलनमा प्रशिक्षक कोजीले बताए । त्यस्तै टोलीमा टेक्निकल र ट्याकटीकल पक्षहरु सुधार गर्ने उनले थपे । कोजीले आफ्नो दुई वर्षे कार्यकालमा टोलीमा केही सुधार भएपनि सोचेजस्तो हुन नसकेको बताए ।

एन्फाका महासचिव धिरेन्द्र प्रधानका अनुसार प्रशिक्षक कोजीको पारिश्रमिक विगतमा जस्तै नेपाल सरकारले उपलब्ध गराउने छ । यसअघि जापान सरकारले बेहोर्ने टेक्निकल डाइरेक्टर चियाकीको पारिश्रमिक अब भने जाइकाले उपलब्ध गराउनेछ ।

नेपाललाई एएफसी सोलिडारिटी कपको उपाधि जिताएका कोजीले एएफसी कपको छनोट चरणमा पनि नेपाली टोली सम्हालेका छन् । छनोट चरणको समूह ‘एफ’ मा रहेको नेपाल दुई खेलमा बराबरी गर्दै समूहको पुछारमा छ । घरेलु मैदानमा नेपालले यमन र फिलिपिन्सलाई बराबरीमा रोकेको थियो । छनोटको अन्तिम खेलमा नेपालले २७ मार्चमा यमनको सामना गर्नेछ ।