काठमाडौं (हाम्रो खेलकुद) – जारी हिरो आई-लिगमा नेपाली गोलकिपर किरण चेम्जोङ सम्मिलित मिनेर्भा पञ्जाब चेन्नाई सिटीसँग २-१ ले पराजित भएको छ ।
किरण यस खेलमा पनि सुरुवाती ११ मै परेका थिए । घरेलु टोली चेन्नाई सिटीले खेलको पाँचौं मिनेटमा माइकल सुसाइराजको गोलबाट अग्रता लिएको थियो । पञ्जाबका चेन्चो ग्येल्चेनले टोलीलाई बराबरी दिलाए पनि चेन्नाईका अलेक्जानडर राकिचले दोस्रो हाफमा गोल गर्दै जित सुनिश्चित पारे ।
सो खेल जितेमा पञ्जाब लिग उपाधि जित्ने निकै बलियो स्थितिमा हुन्थ्यो । पञ्जाब तालिकाको अग्रस्थानमा यथावत् छ तर उपाधि जित्न उसलाई अन्य टोलीहरुको नतिजाले पनि साथ दिनु पर्नेछ । पञ्जाबको १७ खेलबाट ३२ अंक रहेको छ । त्यस्तै १७ खेलमा नेरोकाको ३१ अंक छ भने इष्ट बेंगालको १६ खेलमा २९ अंक रहेको छ ।
सिजनको अन्तिम खेलमा मिनेर्भा पञ्जाबले मार्च ८ मा चर्चिल ब्रदर्सको सामना गर्नेछ । उपाधि जित्नका लागि पञ्जाबले सो खेल राम्रो अन्तरले जित्दै अरु नतिजा आफ्नो पक्ष्यमा जाने आशा गर्नु पर्ने हुन्छ ।
