काठमाडौं (हाम्रो खेलकुद) – हिरो आइ-लिग अन्तर्गतको आज अन्तिम दिनमा नेपाली राष्ट्रिय टोलीका गोलकिपर किरण चेम्जोङ सम्मिलित मिनेर्भा पञ्जाबलाई उपाधि जित्ने ठूलो अवसर रहेको छ । अन्तिम दिनसम्म पनि चार टोली उपाधि होडमा रहेकाले आजका खेलहरु निकै रोमाञ्चक हुने पक्का छ ।

मिनेर्भा पञ्जाबको १७ खेलमा ३२ अंक रहेको छ र आज मिनेर्भाले अन्तिम खेलमा चर्चिल ब्रदर्सको सामना आफ्नो घरेलु मैदानमा गर्ने छ । सो खेलमा जित हांसिल गर्न सके मिनेर्भाले उपाधि सुनिश्चित गर्ने छ ।

त्यस्तै दोस्रो स्थानमा रहेको नेरोकाको ३१ अंक, तेस्रो स्थाको मोहन बगानको ३० अंक र चौथो स्थानमा रहेको इष्ट बेंगालको पनि ३० अंक रहेको छ । गणितीय हिसाबले यी चारै टोलीको उपाधि जित्ने सम्भावना रहेको छ ।आज नेरोका र इष्ट बेंगालसँग भिड्दै छ भने मोहन बगानले गोकुलामको सामना गर्ने छ ।

नेपाली राष्ट्रिय टोलीका फरवार्ड विमल घर्ती मगर सम्मिलित मोहन बगानको पनि उपाधि सम्भावना रहे पनि सो सम्भावना निकै झिनो छ । मोहन बगानले अन्तिम खेल बराबर खेल्यो अथवा हार्‍यो भने उसको उपाधि सम्भावना समाप्त हुने छ । त्यसैले मोहन बगानलाई उपाधि जित्न आफ्नो अन्तिम खेल जित्नै पर्छ । त्यस्तै मिनेर्भा आफ्नो खेलमा हार्नु पर्छ र इष्ट बेंगालले नेरोकासँग बराबरी खेल्नु पर्ने हुन्छ ।

मिनेर्भाले उपाधि जित्न के-के हुनु पर्छ?

– मिनेर्भाले आफ्नो अन्तिम खेलमा चर्चिल ब्रदर्सलाई जिते पुग्छ ।

– मिनेर्भाले आफ्नो अन्तिम खेल बराबरी खेले, मोहन बगान गोकुलमसँग हार्नु पर्छ । त्यस्तै नेरोका र इष्ट बेंगालले बराबरी खेल्नु पर्छ ।

– मिनेर्भाले आफ्नो अन्तिम खेल हारे, नेरोका र इष्ट बेंगालले बराबरी खेल्नु पर्छ भने मोहन बगानले गोकुलामलाई जित्नु हुँदैन ।