तिलोत्तमा गोल्डकपमा आयोजक रुपन्देहीको जित

दिपक न्यौपाने
बुटवल – आयोजक लाली रुपन्देही ११ ले २० औं तिलोत्तमा गोल्डकप फुटबल प्रतियोगितामा विजयी सुरुआत गरेको छ । सुदूरपश्चिम ११ लाई २–० ले हराउँदै रुपन्देही अघि बढेको हो । देविनगरस्थित एन्फा टेक्निकल सेन्टरमा रुपन्देहीलाई जित दिलाउन निशान लिम्बुले पहिलो हाफमै २ गोल गरेका थिए ।

सातौं मिनेटमा पहिलो गोल गरेको निशालले ४२ औं मिनेटमा दोस्रो गोल गरे । निशान नै खेलको म्यान अफ दी म्याच घोषित भए । रुपन्देही जिल्ला फुटबल संघले आयोजनामा १० टोलीको सहभागिता रहेको प्रतियोगिताको उद्घाटन प्रतिनिधि सभा सदस्य छविलाल विश्वकर्माले गरे ।

विश्वकर्माले खेलकुदको विकास विना समाजले प्रगति गर्न नसक्ने बताए । पूर्व खेलाडी नाताले पनि आफु खेलकुद विकासका लागि सक्दो सहयोग गर्ने तयार रहेको बताए ।

विजेताले ७ लाख ७७ हजार ७ सय ७७ रुपैयाँ प्राप्त गर्ने प्रतियोगिताको दोस्रो टोलीले ४ लाख ४४ हजार ४ सय ४४ रुपैयाँ प्राप्त गर्नेछन् । सर्वोत्कृष्ट खेलाडीले मोटरसाइकल पुरस्कार पाउने प्रतियोगिताका विधागत उत्कृष्ट खेलाडीले समान २१ हजार रुपैयाँ प्राप्त गर्नेछन् ।