सबिन शेर्मा
झापा – धुलाबारीको सनसाइन महिला फुटबल क्लबले तेस्रो झापा जिल्ला महिला फुटबल प्रतियोगिताको उपाधि जितेको छ । खुदनाबारीको जुनतारा फुटबल क्लबलाई बिहीबार ४–० ले हराउँदै सनसाइन च्याम्पियन बनेको हो । झापा सुरुङ्गाको कनकाई क्याम्पसको मैदानमा भएको फाइनलमा मुना लावती र रोमा भुजेलले समान २ गोल गरे ।
मुनाले चौथो र ६० औं मिनेटमा गोल गरेकी थिइन् । मुनाको दुवै गोलमा रोमाको पास थियो । रोमा आफैले १० औं र २५ औं मिनेटमा गोल गरिन् । जुनताराका खेलाडीले गोल फर्काउने अवसर पाए पनि सफल भएनन् । सनसाइनकी मुना प्रतियोगिताको सर्वोत्कृष्ट खेलाडी घोषित भइन् र उनले ३ हजार रुपैयाँ प्राप्त गरिन् ।
६ गोल गरेकी आयोजक कनकाइ खेलकुद प्रतिष्ठानकी निर्मला राई उच्च गोलकर्ता बनिन् र उनले ५ हजार प्राप्त गरिन् । सनसाइनकी रञ्जु राजवंशी उत्कृष्ट गोलकिपर, सोही क्लबकी सुष्मिता चौधरी उत्कृष्ट रक्षक, रोमा भुजले उत्कृष्ट मिडफिल्ड र जुनतारकी कुसुम खतिवडा उत्कृष्ट फरवार्ड घोषित भइन् । उत्कृष्ट सबैले समान १ हजार रुपैयाँ प्राप्त गरे ।
प्रतियोगिताको विजेता टोलीले ५५ हजार र दोस्रो टोलीले ३५ हजार रुपैयाँ प्राप्त गर्यो । कनकाई खेलकुद प्रतिष्ठानको आयोजना प्रतियोगिता फागुन १७ गतेबाट सुरु भएको थियो ।
