बिर्तामोड (हाम्रो खेलकुद) – डोमालाल रंगशालामा जारी रमपम झापा गोल्डकपको दोस्रो सेमीफाइनल खेलमा त्रिभुवन आर्मी क्लब मनाङ मर्स्याङ्ग्दी विरुद्ध विजयी भएको छ । यस जितसँगै आर्मी फाइनलमा प्रवेश गरेको छ र उपाधिका लागि रमपम झापा ११ सँग भिडन्त पक्का गरेको छ ।

आर्मीको जितमा नेपाली राष्ट्रिय टोलीका स्ट्राइकर नवयुग श्रेष्ठले निर्णायक गोल गरे । नवयुगले खेल शुरु भएको दोस्रो मिनेटमै टोलीलाई अग्रता दिलाएका थिए । उनले पोष्टको दायाँ बार च्याप्दै गरेको प्रहारले डिफेन्डिङ च्याम्पियन मनाङ मर्स्याङ्ग्दीलाई घर फर्कायो ।

खेलको ४५ औं मिनेटमा टंक बस्नेतले आर्मीका लागि अग्रता दोब्बर पार्ने मौका गुमाएका थिए । त्यस्तै तीन विदेशी खेलाडी सहित मैदानमा उत्रिएको मनाङका लागि खेलको १० औं मिनेटमा भिक्टरले गरेको प्रहार पोष्टमा लागेर फर्किएको थियो । २४ औं मिनेटमा सुजल श्रेष्ठले गरेको क्रसमा विमल राणाले डि बक्समा पाएको बललाई फितलो प्रहार गरेका थिए । ५९ औं मिनेटमा विशाल राईको क्रसमा अञ्जन बिष्टले गरेको हेडर आर्मीका गोलरक्षक बिकेश कुथुले बचाऊ गरेका थिए ।

खेलको म्यान अफ द म्याच त्रिभुवन आर्मीका गोलरक्षक विकेश कुथु घोषित भए । उनले नगद २५ हजार रुपैया पुरस्कार पाए । प्रतियोगिताको विजेताले नगद १२ लाख ५१ हजार र उपविजेताले ६ लाख रुपैयाँ पुरस्कार पाउने छन् ।