बिर्तामोड (हाम्रो खेलकुद) – झापा गोल्डकपको निरन्तर तेस्रो पटक फाइनलमा पुगेको रमपम झापा ११ र यो वर्षको सर्वाधिक सफल टोली त्रिभुवन आर्मी क्लब आज उपाधिका लागि भिड्दै छन् ।

पत्रकार सम्मेलनमा दायाँबाट क्रमश :आर्मीका प्रशिक्षक चुनबहादुर थापा, भरत खवास तथा झापाका कप्तान योगेश गुरुङ र प्रशिक्षक प्रवेश कटुवाल । तस्बिर सौजन्य एनएसजेएफ /झापा

वीरगन्जमा विशाल स्मृति जितेको आर्मीले त्यसपछि सताक्षी गोल्डकप, मेची नेत्रालय काकरभिट्टा गोल्डकप, नेपाल आइस सुदूरपश्चिम खप्तड गोल्डकप , सिमरा गोल्डकप र हेटौडा गोल्डको उपाधि जितेको थियो । आर्मीले विभागिय टोली नेपाल पुलिस र लक्ष्मी हुन्डाई मनाङ मस्र्याङ्दीलाई हराउँदै अन्तिम दुईको यात्रा तय गरेको थियो । आर्मीका कप्तान भरत खवासले झापामा आएर खेल्दा हौसला मिलेको बताएका छन् ।

अर्को तर्फ झापाले सुदुरपश्चिम ११, सिक्किम युनाइटेड र रुस्लान थ्री स्टार क्लबलाई हराएर फाइनल यात्रा तय गरेको थियो । फाइनलको अघिल्लो दिन आइतबार भएको पत्रकार सम्मेलनमा झापा ११ का प्रशिक्षक प्रवेश कटवालले खेलाडीको कडा मेहेनत र दर्शकको समर्थनको आधारमा फाइनल जित्ने बताए । उनले आर्मी सशक्त टोली भएपछि आफ्नो टोली टेक्निकल गेममा उत्कृष्ट भएकाले उल्लेख गर्दै उपाधि जित्ने दाबी गरे ।

झापा ११ का कप्तान योगेश गुरुङले आयोजकको अनुबन्धनका कारण झापाली खेलाडीमा हौसला बढेकाले फाइनलमा पनि उत्कृष्ट प्रदर्शन गर्ने बताए । उनले उपाधि जितेर झापाली दर्शकको चाहना पुरा गर्ने दावी गरे । त्यसैगरी आर्मीका प्रशिक्षक चुनबहादुर थापाले खेलाडीको अनुभवलाई उपयोग गरेर खेल आफ्नो पक्षमा पार्ने रणनीति लिएको बताएका छन् । आर्मीमा झापामा भन्दा धेरै जना राष्ट्रिय टोलीमा छन् । झापाको टोली बलियो भएपनि सिजनको सातौं उपाधि जित्न टोली सक्षमत रहेको थापाको भनाई थियो ।