दिपक न्यौपाने

बुटवल – बुटवलमा जारी २० औं तिलोत्तमा गोल्डकपको क्वाटरफाइनलमा फ्रेन्ड्स क्लबलाई पेनाल्टी सुटआउटमा ४-३ ले पाखा लगाउँदै रुस्लान थ्रीस्टारले अन्तिम चारमा आफ्नो स्थान पक्का गरेको छ ।

तस्बिर: दिपक ज्ञवाली

देविनगरस्थित एन्फा एकेडेमीको खेल मैदानमा सोमबार भएको रोमाञ्चक खेलमा फ्रेन्ड्सलाई टाइब्रेकरमा ४–३ ले पराजित गर्दै थ्रीस्टारले सेमिफाइनलमा आफ्नो स्थान पक्का गरेको हो ।

खेलको पाँचौं मिनेटमा फ्रेन्ड्सका विदेशी खेलाडी जोनल ग्लोरीले गोल गर्दै टोलीलाई अग्रता दिलाएका थिए । सुनिल श्रेष्ठको पासलाई सदुपयोग गर्दै ग्लोरीले गोल गरेका थिए । त्यस्तै खेलको २० औं मिनेटमा थ्रीस्टारका अजयी मार्टिन्सले निरज बस्नेतको फ्रिकिकमा हेडिङ गोल गर्दै खेललाई बराबरीमा ल्याएका थिए ।

खेल बराबरीमा पुगेसँगै फ्रेन्ड्सका खेलाडी दबाबमा आएका थिए भने गोल गरेसँगै हौसिएको थ्रीस्टारले दोस्रो हाफमा अझ सुधारिएको खेल पस्किन सफल भयो । दोस्रो हाफको तेस्रो मिनेटमा नै सुसान श्रेष्ठले फ्रेन्ड्सका गोलरक्षक राजाबाबु थापाको गल्तीको फाइदा उठाउँदै गोल गरी टोलीलाई २–१ गोलको अग्रता दिलाए ।

तर खेलको ८५ औं मिनेटमा फ्रेन्ड्सका सेल्लीले दर्शनीय गोल गरी खेललाई पुन: बराबरीमा ल्याएका थिए । निर्धारित ९० मिनेटको समय २–२ को बराबरीमा सकिएपछी खेल पेनाल्टी सुटआउटमा पुगेको थियो ।

थ्रीस्टारका निरज बस्नेत, बुद्ध चेम्जोङ्ग, कप्तान निराजन खड्का र विजय धिमाल पेनाल्टीमा चुकेनन् भने रेजिन धिमालको प्रहार गोलकिपर राजाबाबुले रोकेका थिए ।

खेलमा गोल गरेका सेल्ली पेनाल्टीमा भने चुकेका थिए । त्यस्तै वर्षात गुरुङ्ग, कुलदिप कार्की, जङ्गबु शेर्पाले आफ्नो प्रहार परिणत गर्दा सरोज योन्जन भने पेनाल्टीमा चुके । यसरी पेनाल्टीमा ४-३ को जितसँगै थ्रीस्टारले अन्तिमा चारमा आफ्नो स्थान पक्का गरेको हो ।

खेलमा थ्रीस्टारका गोलकिपर एलेन न्यौपाने ‘म्यान अफ द म्याच’ घोषित हुँदै नगद ११ हजार १ सय ११ तथा ट्रफीबाट पुरस्कृत भएका थिए ।मंगलबार अन्तिम क्वाटरफाईनलमा विभागीय टोली नेपाल आर्मीले मनाङ्ग मर्स्याङ्ग्दी क्लबको सामना गर्ने छ ।