काइरो (एजेन्सी) – लिभरपुलका स्टार खेलाडी मोहम्मद सालाह अहिले विश्व फुटबलमा सबैभन्दा लयमा रहेका खेलाडी हुन् । उनले इजिप्टमा अहिले यति प्रभाव बनाएका छन् कि राष्ट्रपतिको चुनावमा उठ्दै नउठी उनले १० लाख मत पाएका छन् ।

सालाहले दुई साता अघि वाटफोर्ड विरुद्ध चार गोल गरेका थिए । इजिप्टबाट मैत्रीपूर्ण खेलमा उनले पोर्चुगल विरुद्ध पनि एक गोल गरे भने क्रिस्टल प्यालेस विरुद्ध निर्णायक गोल गर्दै यस सिजनका लागि आफ्नो गोल सुची ३७ पुर्‍याएका छन् । यो सिजन उनको प्रदर्शन लियोनल मेस्सी र क्रिस्टियानो रोनाल्डोकै स्तरमा रहेको छ ।

हालै सम्पन्न इजिप्टको राष्ट्रपतिको चुनावमा सालाहले आफ्नो राष्ट्रमा आफ्नो लोकप्रियता पनि सिद्ध गरेका छन् । राष्ट्रपतिको चुनावमा अब्देल फत्ताह अल-सिसीले ९२ प्रतिशत मत प्राप्त गर्दै पुन: राष्ट्रपति चयन हुन सफल रहे । पच्चिस करोड जनाले मतदान गरेको चुनावमा उनका विरोधीले केवल ३ प्रतिशत मत प्राप्त गरे ।

इकोनोमिस्टका अनुसार १० लाख जनताले दुवै उम्मेद्वारको नाम काट्दै मोहम्मद सालाहलाई मत खसालेका थिए । ती १० लाख मत बदर हुन पुगे । यस सिजन जादुयी लयमा रहेका सालाहलाई राष्ट्र नायकको रुपमै चिनिन थालेको छ । उनलाई ‘इजिप्सियन किङ’ र ‘इजिप्सियन मेस्सी’को उपनाम पनि दिइएको छ ।