मस्को (एजेन्सी) – विश्वकप फुटबलअन्तर्गत आइतबार राति युवा खेलाडीको जोसले भरिएको इंग्ल्यान्डले ट्युनिसियाको सामना गर्दै छ । खेल नेपाली समयअनुसार भोल्गोग्राड एरिनामा राति ११ः४५ बजेपछि सुरु हुनेछ ।

युवा खेलाडीको जोसले भरिएको इंग्ल्यान्ड आफ्नो पहिलो खेलमा तुलनात्मक रूपमा कमजोर ट्युनिसियालाई सहजै पराजित गर्दै दोस्रो चरण प्रवेशलाई सहज बनाउने लक्ष्यमा हुनेछ । हरेक विश्वकपमा दाबेदार टिमका रूपमा रहेको इंग्ल्यान्ड रसिया विश्वकपमा पनि दाबेदार टिममध्येको एक टोली हो । तर, इंग्ल्यान्ड हरेक संस्करणका विश्वकपहरूमा कागजमा मात्रै बलियो देखिँदै आएको छ ।

इंग्ल्यान्डलाई बलियो देखिनुको कारण त्यहाँ हुने विश्वले नै रुचाउने र सबैभन्दा बढी हेरिने इंग्लिस प्रिमियर लिगले हुन सक्छ । यही लिगमा पनि इंग्ल्यान्डका खेलाडीहरूले पनि उत्कृष्ट खेल पस्किरहेका हुन्छन् । अहिले इंग्लिस टोलीमा युवा खेलाडीहरूको जमात छ । इंग्ल्यान्ड यही युवा टोलीको भरमा विश्वकपको उपाधि जित्ने लक्ष्यमा छ । इंग्ल्यान्डले विश्पकप जित्न नसकेको ५२ वर्ष पुगिसकेको छ । एकपटकको उपाधि विजेता इंग्ल्यान्ड १९९० मा सेमिफाइनलमा पुग्नु त्यसपछिको सबैभन्दा ठूलो उपलब्धि हो ।

त्यसयताका २००२ र २००६ को विश्वकपमा इंग्ल्यान्ड क्वार्टरफाइनलसम्म मात्र पुग्न सक्यो । २०१४ को विश्वकप भने इंग्ल्यान्डका लागि बिर्सनलायक नै बन्यो । इटाली, उरुग्वे र कोस्टारिका रहेको समूहबाट इंग्ल्यान्ड जितविहीन हुँदै घर फर्कियो । अहिले समय फेरिएको छ । त्यतिबेलाका चर्चित स्ट्राइकर वाइने रोनीको बर्हिगमन भैसक्दा नयाँ स्टारको रूपमा ह्यारी केन, मार्काेस रासफोर्ड, जेमी भार्डी र रहिम स्ट्रलिङजस्ता स्टार खेलाडीहरूको जन्म भएसकेको छ ।

यिनै युवा खेलाडीको भरमा इंग्ल्यान्ड ट्युनिसियामाथि हावी हुने देखिएको छ । प्रशिक्षक ग्यारेथ साउथगेटले अधिकांश युवा खेलाडीलाई यसपटकको विश्वकपमा विश्वास गर्दै इंग्ल्यान्डले लामो यात्रा तय गर्नेमा आशावादी छन् । अभ्यास खेलमा नाइजेरियामाथि प्राप्त २–१ को तथा कोस्टारिकामाथि प्राप्त २–० को जितले पनि इंग्ल्यान्ड हौसिएको छ । इंग्ल्यान्डले २४ जुनमा विश्वकपमा पहिलोपटक छानिएको पनामासँग र २८ जुनमा बेल्जियमसँग समूह चरणमा प्रतिस्पर्धा गर्नेछ ।

यता, ट्युनिसिया इंग्ल्यान्डको जोसलाई निस्तेज पार्ने लक्ष्यमा रहनेछ । नकआउट चरणको लक्ष्यमा रहेको अफ्रिकी टोली ट्युनिसिया बलियो मानिएको इंग्ल्यान्ड र बेल्जियमलाई बराबरीमा रोकेर नव प्रवेशी पनामालाई पराजित गर्ने लक्ष्यमा हुनेछ । हालसम्मका विश्वकपमा ट्युनिसिया नकआउट चरणभन्दा माथि उठ्न सकेको छैन । विश्वकपअघिको मैत्रीपूर्ण खेलमा ट्युनिसियाले टर्कीलाई २–२ गोलको बराबरीमा रोक्दा उपाधिको दाबेदार स्पेनसँग १–० को झिनो हार बेहोरेको थियो ।

यी दुई टिमले अहिलेसम्म एकपटक मात्रै प्रतिस्पर्धा गरेका छन् । १९९८ को विश्वकपमा प्रतिस्पर्धा गरेपछि यी दुई टोली पहिलोपटक खेल्न लागेका हुन् । सो खेलमा इंग्ल्यान्डले २–० ले बाजी मारेको थियो ।

अनुमान

इंग्ल्यान्ड २-० ट्युनिसिया