तेहेरान (एजेन्सी)– मेस्सीको नामले परिचित इरानी राष्ट्रिय फुटबल टोलीका मुख्य खेलाडी तथा फरवार्ड सरदार अज्मौनले अन्तर्राष्ट्रिय फुटबलबाट सन्यासको घोषणा गरेका छन् । २३ वर्षीय अज्मौनले रसिया विश्वकप लगत्तै सन्यासको घोषणा गरेका हुन् । रुस विश्वकपमा गोल गर्न नसकेपछि आफ्नो अपमान सहन नसकेर आमा गम्भीर बिरामी परेको भन्दै उनले सन्यासको घोषणा गरेको बताएका छन् ।

‘इरानका लागि खेल्न छाड्ने आफ्नो निर्णयले म आफै दुःखी छु । तर, म र टिमको आलोचनाका कारण आमा गम्भीर बिरामी हुनुभएको छ ’ सन्यास घोषणा गर्दै अज्मौनले भनेका छन्, ‘मेरी आमा गम्भीर बिमारी हुनुभएको छ । म कसरी खुसी हुन सक्छु ? सन्यासबाहेक मेरो विकल्प नै रहेन । त्यसैले सन्यासको घोषणा गर्न बाध्य भएको हुँ ।’

‘टोली र मेरो नै अनावश्यक आलोचना ले मलाई कठिन अवस्थामा पु¥याएको छ , सन्यासपछि उनले भने, जहाँ मैले एक वा दोस्रो चुन्नुपर्ने भएको छ । अवश्य पनि म मेरी आमालाई नै चुन्नेछु ।’ रसियन क्लब रुविन काजानबाट व्यवसायिक फुटबल खेलिरहेका अज्मौनले विश्वकपको छनोट प्रतियोगितामा १४ खेलमा ११ गोल गरेका थिए ।

तर, रुस विश्वकपको समूह चरणका तीनै खेलमा अज्मौन गोल गर्न असमर्थ रहे । विश्वकपमा मोरक्कोलाई पराजित गरेको इरान स्पेनसँग पराजित भएको थियो । पोर्चुगललाई बराबरीमा रोक्न सफल भएको थियो । १९ वर्षमा इरानको राष्ट्रिय टोलीमा स्थान बनाएका अज्मौनले अन्तर्राष्ट्रिय खेल जीवनमा ३३ खेल खेलेर २३ गोल गरिसकेका छन् ।